Сумар дня на 14. січня/януара 2022 р.

Приносиме вам сумар медияльной ґрупы ЛЕМ.фм+ на ден 14. січня/януара 2022 р.

Методична інструкция поможе перегляднійше робити розрахункы на аплікацию языковых прав меншын

В минулу середу, 12. січня/януара, на офіцияльным сайті Уряду полномічного влады Словацкой Республикы про нацийональны меншыны была опубликувана методична інстукция, котра має помочы самосправам і державным урядам забезпечыти перегляднійше робити розрахункы на аплікацию языковых прав меншын. За полномічным Ласлом Буковскым, інструкция клясифікує окремы обовязкы з закону про самосправы і державну адміністрацию. Інструкция рекомендує приняти до роботы односне чысло робітників, котры знают язык меншын, і орґанізувати про них языкову компетенцийну освіту. Рекомендує і зрядити Фонд на підпору языковых прав. Задача вытворити документ вышла з даных баданя, котры принесла Справа о стані хоснуваня языків нацийональных меншын на териториі Словацкой Республикы за період років 2019-2020. Баданя вказало, же вельо сел не знало порахувати середків на забезпечыня аплікациі закону, многы села подали нерелеванты даны, а недостаточны даны вышли і з анализы одповіди державных орґанів.

В Малопольщы ліквідуют білы комунікацийны плямы

В тым році в Малопольщы о середкы з Фонду Розвитку Автобусовых Перевозів внескувало близко 60 самоурядів, котры отримают разом 35 млн зл на фінансуваня автобусовых курсів публичного хосну. 10% коштів фунґуваня леній покрыют самоуряды. Разом в реґіоні буде доступных 216 автобусовых леній, тє. близко 50 веце як влони. Фундуш має помочы ліквідувати тзв. білы комунікацийны плямы – іде о малы місцевости, котрых жытелі не мают доступу до публичного транспорту. В Ґорлицях завдякы дотациі з Фундушу одкрытый был курс через Санкову, Маластів і Ґладышів до Смереківця. На тоту ціль повіт отримал понад 90 тис. злотых.

Ініциятива Дикы Карпаты оскаржат Державны Лісы о вытинку памятників природы

На фейсбуковым профіли Ініциятивы Дикы Карпаты явил ся в понедільок, 10 січня/януара, пост, в котрым Ініциятива оскаржат Державны Лісы. В минулым році природникы з ініциятивы нашли в серци Перемышльского Погіря вынятковый фраґмент Карпатской Пущы. Зложыли товды в Надлісництві Красічын писмо, в котрым жадали заховати 27 ялиц і буків, сполняючых критериі узнаня за памятникы природы – охорона такых дерев належыт до обовязків лісників. Надлісництво одшмарило внесок, але завдякы великій социяльній пресиі змінили рішыня і зобовязали ся не вытинати реченых дерев. Тепер вказало ся, же зголошены дерева были єднак вытяты. Покля што в короткій одповіди на своім профіли Надлісництво Красічын не признало, же догваріня в справі охороны дерев были недотриманы.

Маршалок візитувал санківскы інвестициі

В понедільок, 10. січня/януара, маршалок малопольского воєвідства Вітольд Козловскій был з візитом в Ґміні Санкова. Маршалок візитувал м.ін. завершены недавно інвестициі. Єдном з них был міст при воєвідскій дорозі медже Санковом і Сярами, якій фінансуваный был по половині з середків воєвідства і державного буджету. Маршалок візитувал тіж інвестициі в Курорті Вапенне.