Сумар дня на 14. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 14. вересня/септембра 2021 р.

Папа римскій Франциск стрітил ся з вірныма на Словациі і Мадярах 

В неділю, 12. вересня/септембра, зачала ся візита папы римского Франциска на Мадярах і Словациі, котра тырвала буде до 15. вересня/септембра. Папа перше прилетіл до Будапешту, де м.ін. взял участ в службі на закінчыня 52. Медженародного Евхаристичного Конґресу. Пак полетіл до Братиславы, де в понедільок стрітил ся з президентком Словациі Зузаном Чапутовом. В часі стрічы в Президентскым Палаци выголосил слово до представників власти, жытелів і дипломатичного корпусу. Участ в поздоровліню папы Франциска взяла і делеґация Русинів, в склад котрой вошли Петро Медвід, Петро Штефаняк, Мартін Караш, Марек Гребік, отец Франтішек Крайняк і Мілян Ян Піліп. Днес в Пряшові папа римскій буде переводил візантийскій літургіі св. Йоана Златоустого. Пізнійше поіхат іщы до Кошыц, де стрітит ся з молодежом і ромском громадом. Остатнього дня свойой візиты на Словациі одслужыт рано літургію в санктуариі в Шаштіні.

«Промысел і народне ремесло на обшыри Погіря і Лемковины» на знимках 

Музей Дворы Карвациянів і Ґладышів – одділіня Скансен Погіряньского Села в Шымбарку просят на выставу пн. «Промысел і народне ремесло на обшыри Погіря і Лемковины». Выстава проходит в рамках проєкту пн. «Skansenova – системова опіка над спадковином в малопольскых музеях під одкрытым небом». Експозиция презентує так сучасны, як і архівальны фотоґрафіі, што представляют ремісників, але тіж обєкты репрезентуючы сельскій промысел обшыри Погіря і Лемковины. Знимкы походят зо збіркы Музею Дворы Карвациянів і Ґладышів і з Реґіонального Музею в Яслі. Выставу мож обзерати до 1. листопада/новембра.

В Бобовій побудуют наступный еколоґічный пристанок

Не так давно інформували сме о тым, же в Бобовій явила ся нова інвестиция – еколоґічный пристанок. Єст то першый такій обєкт в ґорлицкым повіті. В середині находит ся лавка, ґратя до направы біциґлів, інформацийна таблиця, мультімедияльный екран і стация, яка дозвалят набити мобільне ґратя. При пристанку сут і стоякы на біциґлі. Освітліня і находячы ся в середині нарядя будут засиляны енерґійом з фотовольтаічных панелів замонтуваных на задашыню. Знатя уж, што не єст то остатня того типу інвестиция – власти міста рішыли як раз побудувати наступный еколоґічный пристанок.

Кримінал з акцийом в Низкым Бескіді. Бесіда з Єнджейом Пасєрскым – автором «Кламчуха»

На конец штоси для любителів кримінальных книжок. Публична Бібліотека в Ґорлицях просит в найблизшый четвер, 16. вересня/септембра, на авторску стрічу з Єнджейом Пасєрскым та промоцию його найновшой книжкы «Кламчух». Акция в «Кламчуху», подібні як і в попередній книжці Пасєрского, проходит на обшыри Низкого Бескіду. Автор часто навязує тіж до лемківской культуры. Публикация нашла ся в фіналовій шестці Конкурсу о Grand Prix Кримінальна Варшава. Стріча з Єнджейом Пасєрскым зачне ся о 18.00 год. в сали під Совом.