Сумар дня на 14. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 14. вересня/септембра 2022 р.

«Караімскій Сквер» на варшавскій Воли

Радны Дистрикту Воля в Варшаві в лютым/фебруарі тр. єдноголосно рішыли, што сквер на Ульрихові, при котрым находит ся караімскій цмонтір, буде офіцийні называл ся як «Караімскій Сквер». В поясніню схваліня мож прочытати, же ани в Варшаві, ани в цілій Польщы не фунґує названя містного обєкту, што бы давал доказ прожываня в державі Караімів. Для зазначыня присутности той етнічной меншыны в соспільній свідомости обґрунтуваным єст надати такє названя. Караімы то найменше чысленна етнічна ґрупа узнавана через польскє законодавство. При Караімах в уставі вымінены сут лемківска, ромска і татарска меншыны. Торжественне одкрытя таблиці з новым названьом «Караімскій Сквер» прошло 3. вересня/септембра при присутности локальных представників власти, караімской соспільности ци просто – жытелів Волі. По офіцийній части караімску музику запрезентувал караімскій танцювальный ансамбль Достлар, артистка Каролина Ціха та Михал Куліченко – Караім з Украіны. Презентувана была тіж выстава «Караімы – Найменша Меншына».

Нова церков в Кракові

В Кракові побудуют нову церков. В вікенд 27.-28. серпня/авґуста вчас покровительного праздника краківской церкви – Успінія Пресвятой Богородиці, владыка Атаназий, ординарий лодзкіньско-познаньской єпархіі, посвятил крест на ділянці при ул. Віослярскій, бесідуючы, што буде гын вознесена православна церков покровы свв. Кірила і Методия, апостолів Славян. На торжествах в краківскій церкви присутный был і проф. Яцек Майхровскій, президент Кракова. Підкрислил він, што рішыня о будові православного храму вписує ся в вельовікову традицию Кракова – міста, котре все было отверте, толеранцийне. Подал тіж, што фактичні нова православна святыня є потрібна місту, на што вказує фреквенция в церкви. Тепер православны вірны молят ся в церкви зорґанізуваній в каменици, што находит ся при єдній з уличок при рынку – в будинку бывшой синаґоґы Агават Раім. Парохом краківской парохіі є о. Ярослав Антосюк.

Поправа обставин жытя в ґміні Ропа

7. вересня/септембра тр. Ґміна Ропа вєдно з фірмом Отех підписали догваріня на реализацию інвестициі, што тыкат будовы очыщаючой стациі воды, системы водоводу і розбудовы канализацийной сіти в ґміні Ропа. Грошы на сфінансуваня інвестициі ґміна Ропа отримала з Урядового Проґраму «Польскій Лад». Цілковитый кошт реализациі задачы то веце як 16 млн зл. Закінчыня робіт і цілой інвестициі заплянуване є на конец грудня/децембра 2024 рока.

Дармовы варштаты для діти. Можеш остати новым радийовцьом

В суботу 1. жолтня/окторба тр. в будинку Руской Бурсы в Ґорлицях пройдут першы варштаты радийового кумшту для наймолодшых. Школіня для адептів радийового фаху зачне ся о 13.00 год. професийным розгрітьом голосу і ґамбы, пак участникы дознают ся, як зробити гавкаючого джінґля. А кєд найдут ся охочы молоды акторы, та вєдно з редакторами нашого радия награме радийове слуховиско. По школіню просиме на почастунок. Не маме віковых ограничынь. Родичів просиме присылати зголошыня до участи діти в варштатах на майльовый адрес radio@lem.fm.

Фот. ФБ-профіль Laurynas Vaičiūnas