Сумар дня на 14. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 14. жолтня/октобра 2022 р.

Ансамбль Терочка в новых облечынях

В марци тр. інформували сме, што серед выріжненых внесків проґраму ЕтноПольща орґанізуваного Нацийональным Центром Культуры нашол ся тіж внесок Стоваришыня «Руска Бурса» в Ґорлицях на закуп лемківского облечыня для діючого при орґанізациі ансамблю Терочка. Цілю того проєкту єст підтримувати локальны і культуровы достоменности та творити можливости до участи в культуральным жытю так на селі, як і в місті. В рамках дофінансуваня в квоті 39 тис. зл вшыты і куплены были кроі так для старшой ґрупы Терочка, як і той молодшой. Більшіст дофінансуваня пішло на закуп ґорсетів для дівчат зо старшой ґрупы ансамблю, куплены были і кабаты, запаскы і оплічата. Для мужчын пошыты были ремені і калапы, пару кошель, холошні і ляйбикы. Куплены были тіж основны части облечыня для молодшой ґрупы: оплічата, пацюркы і кабаты для дівчаток та кошелі з ляйбиками дла хлопців. В минулый вікенд в Рускій Бурсі прошол концерт з презентацийом нового облечыня. Члены ансамблю взяли участ в фотоґрафічній сесиі – знимкы можете обзерати в Рускій Бурсі.

Zadanie pn. Zakup łemkowskich strojów ludowych dla zespołu „Teroczka” dofinansowano ze środków Ministra Kultury i Dziedzictwa Narodowego w ramach programu Narodowego Centrum Kultury: EtnoPolska. Edycja 2022.

Курорт Рыманів дальше в руках підкарпатского воєвідства

Курорт Рыманів остає в руках воєвідства. В маю тр. радны ґміны приняли схваліня, што будут хотіти переняти уділы курортной спілкы од самоуряду воєвідства. Такє рішыня поясняли тым, што заряд воєвідства не вывязал ся зо складаных обітниц о розвитку і інвестициях в курорті і што локальный самоуряд задбат о курортну спілку ліпше як заряд воєвідства. Голосы, што самоуряд воєвідства не контролює того, што ся діє в курорті, зачали являти ся іщы скорше, в звязку з поступуваньом веденым Центральным Антикорупцийным Бюром (ЦАБ). В понедільок, 10. жолтня/октобра, прошла стріча з ініциятивы маршалка Владислава Ортиля, жебы выяснити речены квестиі, котры явили ся в публичным просторі. Віцемаршалок Пьотр Пільх заповіл, што залежыт ім на спілпрацы з самоурядом ґміны Рыманів. Представникы підкарпатского воєвідства заповіли, што будут новы інвестициі в курорті Рыманів. Шеф дозорной рады спілкы Курорт Рыманів подал, што фінансова кондиция курорту є добра, а діяня ЦАБ безпосередньо не односят ся до діяльности спілкы. Більше на тоту тему прочытате в дописі на нашым портали.

Альбом «Церкви в полудньово-східній Польщы» доціненый

Выдавництво Лібра PL поінформувало, же печатаный влони альбом «Церкви в полудньово-східній Польщы» Каміля Палюшка, з текстом Ярослава Ґємзы і Даміяна Новака, в ґрафічным опрацуваню Панчакєвич Арт.Дізайн, отримал 1. місце в катеґориі альбомы на 30. Загальнопольскым Перегляді Краєзнавчой і Туристичной Книжкы. Додатково альбом отримал выріжніня признаване Польскым Товариством Выдавців Книжок.

Дальшы карпатскы слуховиска в будучым тыжни

Уж в понедільок, 17. жолтня/октобра, о 18.00 год. пройде чергове карпатскє слуховиско, орґанізуване Карпатскым Народным Університетом. Тема стрічы то «Хоснуваня рослин в штоденным жытю Бойків і Лемків». Прелекцию онляйн буде вюл др габ. Лукаш Лучай. Мотузок до стрічы мож найти м.ін. на фейсбуковым сайті Університету. Іщы єдна стріча в рамках сериі пройде в будучым тыжни. В середу – 19. жолтня/октобра, о 17.00 год. др інж. архітектка ляндшафту Аґата Ґайдек оповіст о «Рослинах в придомашніх загородах Бойків і Лемків».