Сумар дня на 15. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 15. червця/юнія 2020 р.

Президентка Словациі поздоровила Русинів з іх торжеством

12. червця/юнія є схваленый Світовым Конґресом Русинів як Ден Русинів Словациі. Русинів з той нагоды поздоровила президентка Словацкой Республикы Зузана Чапутова. Зробила так на своім офіцияльным фейсбуковым профіли. Текст опубликувала по словацкы і по русиньскы. Президентка пожелала Русинам достойных святкувань свойой культуры, языка і істориі, а тіж жебы были горды зо свойой достоменности, культуры і языка. Словацка президентка звернула тіж увагу на социяльны проблемы, якы за єй словами в припаді Русинів сут і державным проблемом. Апєлювала, жебы ся вырівнували реґіональны розділы, якы сут причыном міґрациі за роботом, а при тым і ослаблюваня звязків русиньской меншыны. То не першыраз, коли президентка звернула ся до Русинів. По русиньскы подякувала за голосы уж одраз по президентскых выборах і консеквентно од того часу звертала увагу на проблемы тыкаючы русиньской меншыны. О Русинах не забыл тіж полномічный про меншыны Ласло Буковскій. В своій одозві припонул, же Русинам тіж потрібна русиньска школа. Апелювал, жебы быти гордыма зо свойой достоменности і мати ясны цілі. Вірит тіж, дополнюючы свою выповід, што найблизшый спис населіня вкаже, же про Русинів тоты вартости сут важны і надале будут творителями штоденной істориі Словациі.

Медвід в Устю Ґорлицкым пиршол імати рыбы?

В Устю Рускым вказал ся медвід. Дику звірину стрітил місцевый рыбак, якій скоро рано ішол імати рыбы. Як бесідує жытель Устя, медведя стрітил в пятницю, около 06.30 год. Рыбак взріл выходячого з кряків медведя, якій, стоячы на лабах, міг мати аж і два метры росту. Щестьом, вшытко добрі ся скінчыло, понеже звір не был аґресивный. Присутніст медведів на обшыри Маґурского Нацйонального Парку была уж перше нотувана. Як оцінят Вацлав Ґрондальскій з ловецкого кружка Рысь в Ґорлицях, медвід міг прити на тоту обшыр глядаючы ідла. Підкрислил тіж, же коли і мы найдеме ся в подібній ситуациі, не повинны сме втікати, але ачий спокійні одыйти з небезпечного місця. До тых, якы плянуют одвиджати описуване місце, апелюєме о увагу і розважніст, жебы подібны ситуациі не мали траґічных наслідств.

«Церкви на Лемковині»

18. червця/юнія в Музею Варшавской Архієпархіі буде одкрыта експозиция рисунків авторства Андрия Хыляка, під наголовком «Церкви на Лемковині». На експозициі запрезентуваных буде сорок рисунків представляючых лемківскы церкви. Працы выконаны были ріжныма техніками (угльом, олувцьом, акварелями). Лемківскы церкви уж оддавна сут обєктом фасцинациі вродженого в Креници автора, Андрия Хыляка. Увічняньом прекрасной лемківской сакральной архітектуры автор занимат ся уж од шістдесятых років минулого столітя. Його працы презентуваны были медже інчыма в Канаді і ЗША. Одвиджаючы Музей Варшавской Архієпархіі будут мати можніст обзерати експозицию аж до 30 серпня/авґуста.

Коні вернут аж на осін

Реґєтів то місце, в котрым легко мож одпочнути од містецкого шуму і стрітити ся з природом. Подивляти мож там вельо примірів дикой звірины. При потічку плынучым через Выжній Реґєтів мож, напримір, стрітити бобры і іх жеремя. Од яри на реґєтівскых паствисках мож тіж обсервувати коні з осередка гуцульскых кони. Проходячы ся мальовничом околицьом мож стрітити пасучы ся кобылы та гачата. Найчастійше коні пасут ся в глубині паствиск. Часом же підходят ближе огороджыня і мож іх товды видіти з сельской дорогы. Коні останут на паствисках аж до осени, коли будут назад перенесены до осередка.