Сумар дня на 15. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 15. грудня/децембра 2020 р.

Важна інформация для любителів зимовых спортів, котры плянували выізд в горы на Словацию

На Словациі зас збільшат ся чысло хворых на коронавіруса, з той причыны словацкій уряд рішыл дальшы ограничыня. Тыкати ся они будут головні готелів та лыжных стаций. Ограничыня вводжены будут поступенно. Од пятниці, 10. грудня/децембра, закрыты сут тарасы і загорідкы при реставрациях, а ґастрономічны локалі можут выдавати ідло лем на вынос. Од понеділька, 14. грудня/децембра, обовязуют рестрикциі, котры обнимают головно зимову бранжу. Вшыткы готельовы гості та любителі зимовой ізды на лыжах мусят мати не старшый як 72-годинный неґативный результат тесту на коронавіруса. Покля што розпоряджыня обовязує вшыткых выже 10 рока жытя. З того выходит, же при долшым як 3 дни побыті тест треба буде повторити. Консеквенцийом перебываня на схылах ци візд на обшыр Словациі без важного тесту будут мандаты. Од 21. грудня/децембра закрыты будут склепы за вынятком тых з найпотрібнішым асортиментом. Того же дня на Словациі зачнут ся зимовы вакациі, котры тырвати будут што найменше 3 тыжні.

По 10 роках ґміна Біч мусит выплатити пчолярям одшкодуваня

320 тис. зл – тілько ґміна Біч заплатит за блуд сперед 10 років. По заливі літом 2010 рока власти ґміны рішыли провести акцию проти комарам, з причыны великой кількости тых овадів. Наслідством того рішыня была смерт коло 2 млн пчіл в пасіках 14 пчолярів. Опырск был веденый за згодом попереднього бургомайстра, на жаль в неодповіднім часі і при помочы небезпечных хімічных середків. Пчолярі выступили до суду з колективным позвом о одшкодуваня од ґміны за понесены в тым часі страты. По 10 роках змагань суд узнал вину ґміны і наказал выплатити одшкодуваня в высокости 320 тис. зл. Спілвинна єст тіж фірма, яка вела акцию проти комарам, але єй властителі не жыют, а компанія уж не істнує. З той причыны цілу квоту буде мусіла выплатити ґміна, найправдоподібнійше коштом задач заплянуваных на 2021 рік.

Віртуальный спацер по Коросні і Пряшові

Публична Бібліотека в Коросні і Реґіональна Бібліотека в Пряшові в рамках проєкту «Бібліотека в часі і просторі» зрыхтували аплікацию, в котрій можна віртуальні спацерувати по обох містах. На мапах находят ся важны для міст місця, дакотры барже популярны і знаны, інчы дакус менше, але вшыткы звязаны зо знаныма персонами та історийом реґіону. Цілю аплікациі єст получыти знаня о важных персонах з істориі Коросна і Пряшова з інформациями о книжках і документах находячых ся в бібліотечных збірках і особливо звязаных з тыма особами. В аплікациі находит ся аж 80 біоґрам персон звязаных з Коросном і реґіоном і 60 звязаных з  Пряшовом, вшытко поділене на тематичны стежкы, нп. артисты, літераты, лікарі, історикы ітп. В аплікациі доступна єст тіж можливіст перенести ся до віртуального каталоґу бібліотекы, де мож дознати ся іщы більше о представленых особах. Додатковом атракцийом сут гры о выміненых персонах. Аплікация доступна єст в трьох языках: польскым, словацкым і анґлицкым, а біоґрамы мают тіж версию авдийо.

Першый переізд потягу реляциі Загіря-Краків

Пару тыжнів тому інформували сме о новым розкладі потягів PKP, згідні з котрым одтепер жытелі Ґорлиц штоденні можут подорожувати до Кракова і назад. В неділю, 13. грудня/децембра, офіцийні пущено новый потяг реляциі Загіря-Краків. На стациі Ґорлиці-Заґужаны на подорожуючых ждали бургомайстер Ґорлиц, Рафал Кукля, і його заступця. Першым потягом до міста світла приіхали радникы малопольского і підкарпатского воєвідств. Вшыткы выразили своє задоволіня новым курсом, котрый буде выгідном і скором можливістю подорожы особливо для студентів.