Сумар дня на 15. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 15. листопада/новембра 2022 р.

Ґладышівска парохія нагороджена в конкурсі «Дерево єст з ліса»

Сут уж результаты конкурсу орґанізуваного Державныма Лісами пн. «Дерево єст з ліса». Направленый він был лем на позаурядовы орґанізациі, територияльны самоуряды, парохіі і інчы леґальні діючы конфесийны звязкы. Цілю конкурсу єст промоция Державых Лісів і деревяной архітектуры, в тым самого дерева. Серед многых зголошынь конкурсова капітула выбрала 118 внесків, котры были нагороджены, в тым внесок православной парохіі св. Йоана Крестителя в Ґладышові. Нагородом єст фінансова підпора. Разом Державны Лісы презначыли на тоту ціль 11 млн зл, а каждый з нагородженых може отримати максимальні до 100 тис. зл. Промоцийны задачы, котрых підоймут ся бенефіциєнты, мусят быти завершены до кінця листопада/новембра. Як єднак застерегли орґанізаторы, фінансова нагорода признана буде аж по реализациі задачы і єй позитивній верифікациі.

Дальша церков з Лемковины нагороджена в загальнопольскым конкурсі

Вчера прошло торжественне признаня місц і переданя нагорід в конкурсі «Задбаный Забыток». Серед номінувных в катеґориі Деревяна Архітектура і Будівництво нашла ся грекококатолицка церков свв. Космы і Даміяна з Бортного, заряджаючым і опікуном якой єст музей Дворы Карвациянів і Ґладышів в Ґорлицях. Конкурс орґанізуваный єст Міністерством Культуры і Нацийональной Спадковины і Ґенеральным Інспектором Забытків. Його цілю єст промоция одповідньой опікы над забытками. Змаганя проходят в шестьох катеґориях, а в каждій конкурсова капітула номінує штырі обєкты, серед котрых єден отримує званя лавреата, а решта – выріжніня. Зголошыня до тогорічной едициі конкурсу зачали ся осіню 2021 р., а кінцьом мая конкурсова капітула оголосила список номінуваных обєктів. На результаты треба было ждати до листопада/новембра. Нагороджены і выріжнены в конкурсі отримуют знак «задбаный забыток».

«Панорамы Ганчівскых Гір. Культурова спадковина назв» стріча з Анджейом Пєцухом

Центр Туристичного і Культурового Продукту Ґорлицкого Бескіду просит на стрічу з Анджейом Пєцухом і презентацию його выставы пн. «Панорамы Ганчівскых Гір. Культурова спадковина назв». Анджей Пєцух то реґіоналиста, провідник і історик, автор многых публикаций о ґорлицкій земли. Стріча пройде 26. листопада/новембра о 16.00 год. в Ґалериіі Стара Реміза в Высовій. Подія зачне ся од прелекциі А. Пєцуха м.ін. на тему назв в Ганчівскых Горах Руштовых – вершків, рік, потоків, місцевости ци топоґрафічных обєктів, якы сут звязаны з бесідом прожываючых там наций. А походят они м.ін. з русиньского, польского, словацкого, ци аж і альбаньского языка. Вступ на подію дармо.

ХI едиция конкурсу о Нагороду ім. о. проф. Болеслава Кумора

Зачала ся ХI едиция конкурсу о Нагороду ім. о. проф. Болеслава Кумора, орґанізуваного Соспільно-Культурным Товариством «Сандечан» при підпорі порталю і місячника «Сандечан». Зголошыня приниманы сут до лютого/фебруара 2023 р. в двох катеґориях: книжка о Сандеччыні та сандецкій автор. Цілю конкурсу єст пошырювати ріжного рода публикациі выданы в 2022 р., якы звязаны сут з Сандеччыном, та промувати і нагороджувати авторів родженых або прожываючых на обшыри Сандеччыны. На лавреатів обох катеґорий і выріжненого, котрый выграт в голосуваню чытачів, ждут фінансовы нагороды і памятковы статуі. Каждого рока серед номінуваных до нагороды выдавництв находят ся і тоты звязаны з лемківском темом.

фот. Muzeum Dwory Karwacjanów i Gładyszów