Сумар дня на 15. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 15. листопада/новембра 2023 р.

#StopRomofobi

На улицях Варшавы станули більборды в рамках кампаніі #StopRomofobii. Акцию реализує Центральна Рада Ромів в Польщы і в єй рамках звертают ся безпосередньо до найвекшых ґіґантів, такых фірм як GOOGLE, META ци NETFLIX, жебы не піддавали ся стереотипам і не дозваляли на занедбаня взглядом ромской соспільности, примірово – до GOOGLE’а звертают ся, жебы достерюг іх ромскы свята і на 5. листопада/новембра опубликувал перше ромскє doodle на Медженародный Ден Росмкого Языка. До NETFLIX’а апелюют, жебы вказал іх без упердежынь і што образ выкреуваный в серіали Infamia є артистичном візийом барз міцно осадженом в стереотипах. Як пояснюют реализаторы акциі, в борбі зо стереотипами взглядом Ромів єст іщы барз вельо до зробліня. Хотят, жебы тота меншына была шанувана, трактувана на рівни з інчыма, жебы люде смотріли на них як на люди, а не через призму стереотипово «Циґана». Ромове то найвекша етнічна меншына в Польщы і в Европі, котра є тіж єдном з найбарже стереотипово постеріганых. Зато повториме заклик: #StopRomofobii.

«Біла Вода. Біль непамяти» Домінікы Цєпляк та Камілq Федериґы з нагородом!

Домініка Цєпляк та Каміль Федериґа абсольвенты архітектуры Краківской Політехнікы здобыли перше місце в конкурсі на найліпшы ліценциятскы і маґістерскы роботы зо схоснуваньом бесідуваной істориі за маґістерску роботу пн. «Біла Вода. Біль непамяти». Конкурс орґанізувал Осередок «Памят і Будучніст» та Польскє Товариство Бесідуваной Істориі під покровительством Вроцлавского Річника Бесідуваной Істориі. Перша част іх маґістерской роботы обняла опрацуваня істориі села Біла Вода – як подала капітула в поясніню: «в аналитичній части досконалі зоставили зо собом розділы о памяти і непамяти, травмі і болю, котры сут выдатным поясніньом архітектонной ініциятивы». Дальшом частю роботы было зробити проєкт туристичной стежкы в Білій Воді, котра складат ся з шестьох едукаицйных павілонів о сучасній формі, інспіруваных єднак архетипом невеличкых хыж, характерных для Шляхтівской Руси (выміры, материял). Каждый з павілонів репрезентує єден з пятьох каноничных смыслів (нюх, смак, зір, слух, дотык). Шестый павілон посвяченый є додатковому смыслови – памяти, завдякы котрій можлива є перцепция минулости. Капітула конкурсу подала тіж, што іх маґістерска робота то «вполни інтердисциплінарный твір, успішні вказуючый, як мож получыти доробок бесідуваной істориі, етноґрафічных і історичных бадань, культурознавства та архітектуры». Ґратулюєме!

Рушыли записы на Лемковина Ультра Трейль 2024

Быти може іщы не вшыткы до кінця зреґенерували ся по ювілейній, десятій едициі змагань в літаню Лемковина Ультра Трейль 2023, в котрых найдлоша траса, долгости 150 км, уважана єст за екстремальну, то лем два дни тому рушыли записы на чергову едицию. Тым самым відома єст уж дата Лемковина Ультра Трейль 2024 – а пройде она в днях од 18. до 20. жолтня/октобра. Записати мож ся на котрысу з трас долгости: 150, 100, 70, 48, 30 і 10 км. Тота послідня, найкоротша, мала одбыти ся лем раз, з нагоды 10 років орґанізуваня змагань, але загостит на долше. Є то найліпша пропозиция для осіб, котры зачынают свою пригоду з гірскыма бігами. За два дни записало ся уж веце як 70 осіб на найдолшу, екстремальну трасу 150 км. На сайті орґанізатора доступный є тіж фільм підсумувуючый тогорічну едицию змагань. Партнером подіі Łemkowyna Trail presented by Columbia є Підкарпатскє Воєвідство.

Плюшакы для хворых діти

Іщы до понеділька в Основній Школі номер 3 в Польковицях тырват акция збераня новых, плюшовых забавок. Приносят іх головні ученикы, але до акциі можут влучыти ся вшыткы жытелі. Зобраны плюшакы трафлят до підопічных фундациі «На Ратунок Дітям з Новотворовыма Хворотами». Фундация передаст забавкы до онколоґічной клінікы «Przylądek Nadziei» во Вроцлаві. Колекта тырват до 20. листопада/новембра і приносити мож лем новы забавкы – зато што трафлят до хворых діти.