Сумар дня на 15. марця 2021 р.

Приносиме вам сумар медияльной ґрупы ЛЕМ.фм+ на ден 15. марця 2021 р.

Музей Дворы Карвациянів і Ґладышів в Ґорлицях зас веденый воєвідством

Ґорлицкій музей Дворы Карвациянів і Ґладышів в Ґорлицях буде зас веденый малопольскым воєвідством. Такє рішыня підняли воєвідскы радникы. Як пояснила для радия РДН Івона Ґібас з заряду малопольского воєвідства, має то розвязати м.ін. справы фінансуваня. Порозумліня было рішене за згодом обох стран. Ґорлицкій повіт вюл музей од грудня/децембра 2007 р., але обєкт был в більшости фінансуваный воєвідством. В тым році малопольскій самоуряд передал на тоту ціль веце як мілийон злотых, а повіт сто тисячів.

Продолженый ремонт Любовняньского Замку

Ремонт Любовняньского Замку єст продолжаный. Як поінформувала Леа Геілова з одділіня комунікациі і пропаґациі Уряду Пряшівского Самосправного Краю, в найблизшым часі буде реконструувана пілнічно-східня стіна і третій двір. Кошт реконструкциі то більше як 850 тис. евро. 800 тис. евро передало на тоту ціль Міністерство Інвестиций, Реґіонального Розвитку і Інформатизациі Словацкой Республикы, 51 тис. евро покрыє Пряшівскій Самосправный Край. В замку находят ся експозициі Любовняньского Музею, а на зовни є скансен, де мож видіти архітектуру з реґіону, і з русиньскых сел, в тым деревяну церкву. В зреконструуваных просторах Любовняньского Музею має выникнути інтерактивна археолоґічна еспозиция, яка буде презентувала одвиджаючым автентичне жытя в воєнных касарнях. На третім дворі будут по ремонті вказувати соколярскє і інчы ремесла. Роботы мают ся зачати в кінци того рока, іх завершыня єст плянуване на 2024 рік.

Нова едукацийна стежка в Санковій

В Санковій на Порожнім Поли появила ся лісова едукацийна стежка. Вандруючы можут на інформацийных таблицях чытати о типах окопів і іх презначыню. Послідня таблиця інформує, же то там зродила ся світова істория нафтового промыслу. Ідучы до ліса, в околицях Сяр мож стрітити нафтовы студні – част є одбудувана і забезпечена, але част дале єст одкрыта, зато одвиджаючы історичну копалню, де ся находят найстаршы і першы нафтовы копанкы, мусят быти особливо осторожны.

Кухарска книжка Енді Вархоля до выліцитуваня

В авкцийным домі Bonhams в Ню Йорку явила ся сатирична кухарска книжка Енді Варголя під наголовком «Дикы Малины» (анґ. «Wild Raspberries»). Буде мож єй выліцитувати на онляйновій авкциі. Книжка была зроблена в 1959 р. з помочом проєктанткы інтерєру Сузі Франкфурт, мамы Енді Юлиі та штырьох хлопців, якы мешкали над Варгольом. Франкфурт написала гумористичны рецептуры, Енді іх ілюструвал, сусіды покольорували, мама Юлия выкаліґрафувала текст. Подля авкцийного дому Bonhams, лем 34 примірникы книжкы вказали ся в кольорі, а векшіст была дарувана приятелям і родині, не были продаваны. Як повіл Даррен Сатерленд з Bonhams для маґазину «The Guardian», сесы книжкы вказуют на забаву і жартобливіст, якы товаришыли в розвитку Варголя як артисты. Веце про «Дикы Малины» прочытате на нашым портали.

Початок Великого Посту

Днес для вірных православной Церкви на цілым світі і вірных грекокатолицкой Церкви в дакотрых реґіонах зачынат ся період Великого Посту. В тым часі м.ін. через суровый піст і участ в великопістных богослужынях будут ся они рыхтувати до найважнійшого свята в літургічным календари, якым ся являт Господня Пасха. Вшыткым празднуючым слухачам желаме успішных рыхтувань до великодніх свят.

фот. galeria, muzeum.gorlice.pl