Сумар дня на 15. мая 2020 р.

Приносиме вам сумар медияльной ґрупы ЛЕМ.фм+ на ден 15. мая 2020 р.

Печатали соткы русиньскых выдань

Найстарше з істнуючых русиньскых выдавництв, котре діє дотепер, Рускє Слово, святкує того рока 75 років од свого основаня. Хоц святкуваня мали проходити в маю і червци/юнію, то орґанізаторы зо взгляду на пандемію мусіли іх пересунути на пізнійшый термін. В рамках святкувань пройде конференция і розданя нагорід робітникам і спілпрацівникам выдавництва. Од початку істнуваня печатало оно соткы книжок, прозу і поезию войводиньскых русиньскых авторів, ріжны етноґрафічны і лінґвістичны розправы, антолоґіі, словникы і переклады інчоязычных авторів до русиньского языка. В рамках періодичной пресы выдают тыжденник «Рускє Слово», літературно-артистичный журнал «Шветлосц», журнал для діти «Заградка», молодіжный журнал «Мак» та річник «Народный Календар», пізніше «Рускій Календар». Під выданвицтво належыт і аґентура Рутенпрес. Теперішнім шефом выдавництва є Борис Варґа, скорше были нима м.ін. Дюра Варґа, Дюра Латяк, Любомир Рамач, Гелена Медєші ци Наталия Дудаш.

Церкви отворены на туристів

При дотриманю одповідніх принципів безпекы, в масочках, котры закрывают ніс і ґамбу, зас мож одвиджати деревяны обєкты, якы находят ся на Пути Деревяной Архітектуры в Малопольщы, а то м.ін. вшыткы церкви зо Списку Світовой Спадковины ЮНЕСКО – церков в Брунарах, Квятони, Рыхвалді і Поворознику. В звязку з тым, што простір каждой з них єст інчый, максимальне чысло осіб, якє може быти в середині (при захованю ліміту 15 квадратных метрів на особу) є ріжне – треба тримати ся рекомендаций опікунів обєктів. Окрем того од початку того тыжня мож входити на обшыр більшости скансенів і одкрытых музеів на полудни Польщы, м.ін. на обшыр Мазярской Загороды в Лоси, Скансену Погіряньского Села в Шымбарку, грекокатолицкой церкви в Бортным (тепер єст то музейный обєкт), Сандецкого Етноґрафічного Парку в Новым Санчы ци Музею Пчолярства в Стружах. Округовый Музей в Новым Санчы рыхтує ся тіж до удоступніня одділіня в Креници – Музею Никыфора.

Безплатны тесты на коронавіруса в ґорлицкым шпытали

Од понеділька в ґорлицкым шпытали, а по правді в шатрі уставленым перед будинком, діє пункт, де поберают материял до тестів на коронавіруса. Такы тесты мусят зробити вшыткы, котры сут на обовязковій кварантанні, што была рекомендувана санепідом. В дванадцетым дни обовязковой ізоляциі каждый достає смс-а з повідомліньом о потребі зробити безплатный тест. Материял побраный в Ґорлицях трафит до специялистичных лабораторий в Кракові. Мобільны пункты побераня пробок зорґанізували в цілій державі цілю робити скрінінґовы досліджыня. Необхідным є, жебы до такого пункту дотерти своім автом, без контактуваня ся з інчыма особами. Ґорлицкій пункт отвореный є од 8.00 до 10.00 годины рано. Результат тестів мож провірити через Інтернетове Конто Пациєнта.

Лося-Шымбарк Ленґі-Лося

Війт ґміны Ропа Кароль Ґурскій ввюл до кінця мая заступчу комунікацию. Є то одповід на потребы жытелів обшыри, котром заряджат, в звязку з тым, што з причыны пошырюваня ся коронавіруса приватны перевозникы стримали діяльніст. Тымчасовы переізды введено на трасі Лося-Шымбарк Ленґі-Лося. Бус заберат до 6 осіб, выізд з Лоси о годині 5.45 і 9.45. З Шымбарку бус одізджат о 18.30, по приізді посліднього автобуса в Ґорлиц. Містна комунікация в Ґорлицях фурт діє. Автобусы доізджают до Лібушы, Біча, Быстрой, Кобылянкы, Мощениці, Шымбарку, Білянкы ци Рыхвалду. Заступча комунікация на трасі Лося-Шымбарк-Лося є залежна од істнуючой на даный момент епідемічной ситуациі, заінтересуваня жытелів і фінансовых можливости ґміны.