Сумар дня на 15. мая 2023 р.

Приносиме вам сумар медияльной ґрупы ЛЕМ.фм+ на ден 15. мая 2023 р.

Посвятили першу православну церков побудувану в Варшаві од понад стох років

Вчера, в неділю 14. мая одбыло ся Великє Посвячыня першой православной церкви побудуваной в Варшаві од понад стох років – Агіі Софіі. На торжестві были присутны вшыткы єрархы Польской Автокефальной Православной Церкви, чысленны духовны з цілой Польщы і заграниці. Посвячыня і св. Літургію очелювал владыка Сава, православный митрополита варшавскій і цілой Польщы, якій в тот сам ден святкувал своі 85. уродины і 25. річницю послугы як голова ПАПЦ. Присутны были і делеґациі духовенства інчых конфесий, представникы державных і містецкых власти, парляментаристы і представникы дипломатичного корпусу. Одчытаны были поздоровліня президента Польской Республикы. На службі мож было чути аж 6 хорів, котры співали молитвы в велох языках, в тым і лемківскы напівы. Посвячыня варшавской церкви притягнуло пару тисячів вірных і поломників з цілой Польщы, в тым з лемківскых єпархій. Торжество завершыло ся спільном агапом.

Праві готовый тымчасовый міст над потоком Камяна в Полянах

Кінчат роботы при будові тымчасового мосту над потоком Камяна в селі Поляны в ґміні Крениця. Тымчасовый перехід был потрібный, жебы заняти ся старым мостом. Як підкрислят бургомайстер курорту Пьотр Рыба, то стратеґічный елемент інфраструктуры, бо обслугує туристичный рух в підкарпатскым, люблиньскым, підляшскым, а по части і мазовєцкым та свєнтокшыскым воєвідствах. Дорогу хоснуют і туристы з Малопольщы. Новый міст на воєвідскій дорозі но 981 найпевнійше скінчат будувати іщы в тым році, фірма має час на реализацию інвестициі до половины грудня/децембра. Кошт розобраня старого і будовы нового мосту, а при тым зміцніня убочы потока Камяна то 5,75 млн злотых.

Поступуют працы при будові новой православной святыні в Ґладышові

По зимовій перерві рушыл дальшый етап прац при будові православной церкви в Ґладышові. В гали ясельской фірмы тырват процес монтуваня даху над головном навом. Будова має дост нетиповый характер, вшытко єст перше складане выконавцьом в його працовни в Яслі, а пак розберане і в частях перевожене на пляц будовы в Ґладышові і зас складане. Кєд вшытко піде згідні з пляном, іщы в тым році обєкт буде доведеный до сурового закрытого стану. Товды продолжаны будут працы на зовни святыні. Будова новой церкви зачала ся влони. Храм буде репликом неістнуючой уж церкви святых Космы і Даміяна з Незнайовой, так само уж неістнуючого лемківского села. Як фінально має выглядати церков, мож видіти завдякы мініятуровій макєті, яку зрыхтувал Михал Вархіл. Жебы повело ся завершыти будову, фурт потрібне єст фінансове спертя. Деталі і фотореляцию з тырваючых робіт можете найти на фейсбуковым сайті чыну будовы православной церкви в Ґладышові.

На Маґурі посадили Ліс Памяти Йоана Павла ІІ

В рамках ініциятивы «Лучат нас Дерева» 8. мая на Маґурі прошла акция саджыня дерев. Віцеміністер климату і середовиска Едвард Сярка вєдно з робітниками Надлісництва Ґорлиці, скаутами, мундуровыма службами і представниками локальных власти посадил близко 1400 дерев на Маластівскій Перегыбі. Серед посадженых дерев сут і шпыльковы, і листясты. Буде то четвертый в Малопольщы Ліс Памяти Йоана Павла ІІ. На Маґурі находит ся воєнный цмонтір но 60 з часів І світовой войны. Присутны на акциі саджыня дерев зложыли там квітя. Посліднім пунктом акциі было одслонити обеліск з упамятняючом таблицьом. Помістили на ній цитуваня з апостольского листу Familiaris Consorti авторства папы Йоана Павла ІІ: «Ліс єст єдным з найвекшых дарів натуры для чловека».