Голосник

Сумар дня на 15. вересня/септембра 2020 р.

Приносиме вам сумар медияльной ґрупы ЛЕМ.фм+ на ден 15. вересня/септембра 2020 р.


За нами 40. Лемківска Ватра на Чужыні

Того рока Лемківска Ватра на Чужыні проходила в дакус інчій формі – была то закрыта подія, на яку мож было войти лем з запрошыньом, але орґанізаторы задбали, жебы была она трансмітувана в інтернеті.  В часі подіі на сцені запрезентували ся такы ансамблі як Ластівочка, Кычера, Розтока, Секция, а на закінчыня Файна Ферайна і Троянда. В звязку з такым ювілейом на Ватрі не бракло і однесінь до попередніх стріч – была выстава присвячена сороку огнискам і Ватрам в Михалові ци спомины та бесіда з ініциятором першых ватр. Згідні з традицийом вручено тіж нагороду ім. Никыфора – Епифана Дровняка. Того рока посмертні признано ю покійному Богданови Ґамбальови. Капітула Стоваришыня Лемків передала статую на рукы теперішньой ведучой Стоваришыня «Руска Бурса» в Ґорлицях, Наталиі Малецкой-Новак. Богдан Ґамбаль был посмертно одзначеный нагородом ім. Никыфора за «труд жытя одданый для лемківской культуры».

IX Етноґрафічный Роверовый Райд Слідами проф. Романа Райнфуса

Добры новины для любителів роверовых прогульок. Стоваришыня GorliceBike та Скансен Погіряньского Села в Шымбарку просят на IX Етноґрафічный Роверовый Райд Слідами проф. Романа Райнфуса. Райд выстартує 20. вересня/септембра о годині 9.00 рано. Поділеный він єст на три трасы, якы мают ріжный рівен трудности: єст трудна, туристична – середньо трудна, і родинна – легка. Тогорічный ліміт участників то 150 осіб, а кошт вписового то 20 зл. для осіб родженых перед 2005 роком і 10 зл. родженых по 2005 році. Інтернетовый формуляр зголошынь і вымаганя трас находят ся на офіцийным сайті Музею Двір Карвациянів і Ґладышів.

Лемковина Ультра Трейль 2020

Сме при спортовых інформациях. Дальша добра віст для любителів лемківскых краєвидів. Од 22. до 25. жолтня/октобра семый уж раз проходил буде єден з найбарже знаных маратонів Лемковина Ультра Трейль. Того рока орґанізация акциі не была єднак така легка. Для захованя санітарных норм і інчых ограничынь орґанізаторы мусіли змінити пару річы. Медже інчыма на старті і меті та в пунктах з мериндьом не будут мочы стояти особы незвязаны зо змаганями. Зміны тыкают тіж гармоноґраму подіі. Як все, до выбору єст аж пят можливых трас, якы ся ріжнят дистансом і рівньом трудности. Найдолша траса веде з Крениці до Команчы і має аж 150 км. В звязку з теперішньом ситуацийом і динамічныма змінами орґанізаторы змінили термін присыланя зголошынь ци зміны трасы до 30. вересня/септембра. Подія тішыт ся великом популярністю. Надієме ся, же і того рока на трасах Лемковины Ультра Трейль не бракне представників Лемків.

Ґорлиці можут выграти аж 50 тис. зл.

Туристичны Скарбы Малопольщы то друга едиция плебісциту, цілю котрого єст нагородити найбарже атракцийны, новаторскы і приязны для туристів місця. Конкурс проходит в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, одпочынок на селі і в гостині. В тогорічній едициі подіі серед номінуваных до нагороды сут Ґорлиці і звязаны з нима подіі, м.ін. Фестіваль 4 Страны Карпат ци Сніжны Трасы, якы ведут лісами. Ґорлиці старают ся і о головну нагороду в плебісциті – 50 тис. зл. Голосувати мож до 20. вересня/септембра на офіцийным сайті конкурсу.

Шеруй.

О авторі

Avatar

Коментарі