Сумар дня на 15. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 15. вересня/септембра 2021 р.

В резолюциі участників конґресу FUEN і про Русинів

Од 9. до 12. вересня/септембра в італияньскым місті Терст проходил 65. Конґрес Федеральной Уніі Европейскых Меншын (FUEN). Участ в ним взяло веце як 140 делеґатів з 20 держав, якы представляли 41 меншын. Цілю конґресу было вымінити погляды про актуальный стан і розвиток в обшыри меншыновых проблемів. Был гын присутный і Євген Жупан, голова Народной Рады Русинів Закарпатя і так само голова Общества Карпатскых Русинів, єдиной русиньской орґанізациі, котра є членом FUEN. Проблем Русинів нашол ся в резолюциі принятій делеґатами. Апелює ся в ній, жебы Украіна признала карпатскых Русинів за автохтонну меншыну. На конференциі бесідували тіж о ініциятиві Minority Safepack, котрой цілю было приняти Евросоюзом політичны розвязаня, што хоронят права меншын в ріжных аспектах. Ініциятива, хоц мала достаток підписів од громадян держав Европейской Уніі, не была принята Европейском Комісийом. В головній реолюциі з конґресу ся пише, же делеґаты высловлюют розчаруваня з того кроку Европейкой Комісиі.

Єст выконавця дорогы С19 (S19) Іскжыня-Місце Пястове

Веце як 365 млн зл буде кшотувала будова підкарпатского одтинка експресовой дорогы С19 (S19) Іскжыня-Місце Пястове. Веце як 10-кілометровый фраґмент трасы, котрый буде частю пути Via Carpatia, має быти готовый в 2025 році. В понедільок в Місци Пястовым торжественно підписали догваріня з выконавцьом того одтинка фірмом Aldesa Construcciones Polska (лідер) i Aldesa Construcciones (партнер). Присутный на подіі віцеміністер інфраструктуры Рафал Вебер підкрислил, што підписане догваріня є доказом на вірогідніст міністерства інфраструктуры. В оціні віцеміністра, шляком Via Carpatia заінтересуваны сут вшыткы державы серединной і східньой Европы, што – подля Вебера – потвердили чысленны выповіди на тему той дорогы в часі закінченого в минулым тыжни Економічного Форум в Карпачы. Ціла інвестиция Via Carpatia в Польщы буде коштувала 10 млд зл.

Ярмак св. Михала буде онляйн

Ґміна Ропа просит народных творців до участи в Ярмаку св. Михала, котрый пройде 26. вересня/септембра в селі Ропа. Презентация ремесла і розмаітых артефактів ручной роботы повязаных з традицийом реґіонів Погіря, Лемковины або Выжнього Шариша буде зареґіструвана в формі фільму і запрезентувана на сайті ґміны Ропа посередництвом сервісу YouTube і социяльных порталів 3. жолтня/октобра. Зголошыня треба выслати найпізнійше до 17. вересня/септембра. Подія проходит в рамках проєкту пн. «Карпатскы Брамы: Медже Ропом а Зборовом – охорона і розвиток спільной культуровой спадковины на польско-словацкым пограничы», в рамках трансграничной спілпрацы Інтерреґ Польща-Словация 2014-2020.

Шкляный Ренесанс в Шымбарку

Од 6. до 20. вересня/септембра в Конференцийно-Выставенничым Осередку Каштель в Шымбарку проходят варштаты пн. Шкляный Ренесанс. Сут то варштаты артистичного шкла, вчас котрых діти і молодіж роблят представліня масок, якы находят ся на аттиці ренесансового двору в Шымбарку. Охочы взяти участ в варштатах фурт можут ся зголошувати. Занятя проходят в рамках едукацийного проєкту фінансуваного з середків Міністерства Культуры, Нацийональной Спадковины і Спорту походячых в Фундушу Промоциі Культуры. На 21. вересня/септембра заплянували одкрыти поварштатову выставу. Вшыткы роботы презентуваны будут тіж в специяльным каталоґу.