Сумар дня на 22. червця/юнія 2026 р.

Приносиме вам сумар медияльной ґрупы ЛЕМ.фм+ на ден 22. червця/юнія 2026 р.

Практичны варштаты для жытелів Низкого Бескіду в Рускій Бурсі в Ґорлицях

Стоваришыня «Руска Бурса» в Ґорлицях просит на практичны варштаты для жытелів Низкого Бескіду. Підчас варштатів вкажеме практичны розвязаня, котры помагают жытелям орєнтувати ся в процесах тыкаючых простору, середовиска і локальных інвестиций. Побесідуєме м.ін. о тым: де глядати інформаций о плянуваных інвестициях, як провірити пляністичны документы, якы інституциі одповідают за поєдны рішыня, як корыстати з доступу до публичной інформациі і інформациі о середовиску, коли і як брати участ в консультациях, якы можливости діяня мают жытелі, коли дашто родит іх вантпливости. Будеме працувати на конкретных примірах з ґмін Санкова і Устя Рускє. Варштаты поведе Анна Треіт – архітектка, специялистка дс. охороны природы в Загальнопольскым Товаристві Охороны Птахів. Подія одбуде ся уж в найблизшу суботу 27. червця/юнія в просторах Руской Бурсы, в год. од 11.00 до 16.00. Просиме вшыкых, котрым залежыт на тым, як буде выглядала наша околиця і Низкій Бескід за 10, 20 і 30 років. Варштаты сут безплатны. Подія фінансувана з середків Нацийонального Інституту Свободы – Центру Розвитку Громадяньского Соспільства в рамках Урядового Проґраму Фундуш Громадяньскых Ініциятив NOWEFIO на рокы 2023-2030. Дрібниці найдете гев.

Часово закрыты дорогы на обшыри ґміны Устя Рускє з взвязку з біциґльовом подійом

Ґміна Устя Рускє інформує о дороговых утруднінях в найближшу суботу 27. червця/юнія. В звязку з орґанізацийом того дня спортовой подіі Бескідскій Клясик, на обшыри ґміны Устя Рускє і околиц будут часово закрыты дорогы. Біциґлисты руштат рано з Устя Руского трасом через Климківку, Ропу, Лося, Білянку, Новицю і Одырне до Устя Руского. Дальше підут трасом через Квятон, Шквіртне, Ганчову, Снітницю, Брунары і назад до Устя Руского. Ґміна подала на своім фейсбуковым сайті приблизны годины запертя поєдных одтинків. Ґміна просит жытелів і шоферів о скорше заплянуваня подорожы, триманя осторожности і хоснуваня вызначеных обіздів.

Малопольскы Гірскы Бігы в Креници

Кінцьом того тыжня в Креници одбуде ся чергова, уж четверта едиция Малопольскых Гірскых Бігів. Головным партнером подіі єст Малопольскє Воєвідство. Орґанізаторы подіі прирыхтували ріжнорідны трасы, ведучы Сандецкым і Низкым Бескідом. Найвекшом вызвом буде Креницка Сотка, траса долгости 100 км, з перевысшыньом сігаючым 4570 м. Окрем того в проґрамі находят ся ріжны товаришучы подіі і атракциі направлены на обзераючых і родины. В проґрамі нашли ся і бігы для діти і молодежы та Товарискій Марш Сеньора.

Дискусия о актуальным стані культуры і языка Лемків в Державным Етноґрафічным Музею в Варшаві

Припоминаме, што уж в найблизшый четвер 25. червця/юнія в Державным Етноґрафічным Музею в Варшаві пройде выняткова стріча – бесіда, што тыкала буде актуального стану культуры і языка Лемків. Буде она рефлексийом над дідовизном і сучасном присутністю Лемків/Русинів в европейскій культурі. В бесіді возмут участ: Оксана Ґрабан-Ліхтаньска, Наталия Малецка-Новак, Лідия Стефановска, Юрий Стариньскій і Михал Шымко. Подію поведе др габ. Пьотр Маєвскій. Участ в дебаті єст безплатна, треба лем побрати дармовы білеты, доступны на інтернетовым сайті музею. Тым, котры іщы не виділи выставы «Формы присутности. Штука Лемків/Карпатскых Русинів», припоминаме, што буде она вказувана в Варшаві іщы лем до кінця того місяця.