Сумар дня на 16. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 16. грудня/децембра 2021 р.

Засіданя СКУтНіЕМ

Вчера, 15. грудня/децембра, в Варшаві проходило дальше засіданя СКУтНіЕМ. В проґрамі нашла ся інформация о поділі дотаций на реализацию в 2022 р. задач звязаных з охороном і розвитком достоменности нацийональных і етнічных меншын в Польщы та розвитком реґіонального языка. Присутны на засіданю почули в тій справі выступліня представника Міністерства Внутрішніх Справ і Адміністрациі. Пак выголошеный был м.ін. VIII рапорт МВСіА на тему ситуациі меншын в Польщы. Окремый пункт был присвяченый справі Державного Пляну Одбудовы і шансам нацийональных меншын до черпаня з передвидуваных гын середків. Розсмотрюваны были і інчы справы. На тот момент не знатя, ци были рішаны справы тыкаючы лемківской меншыны. Представникы Лемків покля што не дали ниякой інформациі з того засіданя.

Дотациі для меншын на 2022 рік

Так само вчера, 15. грудня/децембра, явила ся офіцияльна інформация Міністра Внутрішніх Справ і Адміністрациі о поділі дотаций на спертя і розвиток поєдных нацийональных і етнічных меншын в Польщы та розвиток реґіонального языка в 2022 р. Фінансову підпору отримали ріжны лемківскы орґанізациі, а і такы підметы, якы гейбы лем прібуют робити на благо розвитку лемківской меншыны. Серед доціненых проєктів є вельо такых, якы сут новы і першый раз отримали дофінансуваня, але нашли ся і такы, котры сут продолжыньом зачатых перед парома роками ініциятив. Примірово Стоваришыня Лемків отримало дофінансуваня на реализацию ІІІ части фільму Андрия Копчы пн. «Акция Вісла». Стоваришыня «Руска Бурса» в Ґорлицях отримало м.ін. ґрант на выданя ІІІ части «Пісні і Співанок Петра Мурянкы». ЛАПіТ «Кычера» выстарал ся о дофінансуваня на ремонт цмонтеря в Лабовій. Нашы лемківскы медиі – радийо і порталь ЛЕМ.фм+, отримали дофінансуваня в 2022 р. в высокости 320 тис. зл. Полный список признаных дотаций найдете на сайті МВСіА.

Міст в Санковій неодолга одкрытый

Кєд вшытко піде згідні з пляном – уж о пару дни буде наново одкрытый міст в Санковій, якій є на воєвідскій дорозі но. 977. Протягом остатніх місяців обєкт был піддаваный реновациі. З огляду на тото, были зорґанізуваны обізды. Проблем мали головно жытелі той части Лемковины, якы до Ґорлиц і назад ішли од нашых сел, такых як Ропиця Руска, Маластів, Панкна, Ґладышів ци Конечна. Правдоподібно з разом з одкрытьом мосту буде му надана назва. Міст мал бы быти отвореный уж в найблизшый вікенд, значыт в часі, коли може быти більшый рух – перед святами і Новым Роком.

Варголь і Марісоль

Звізда нюйоркской артистичной сцены 60. років минулого столітя Марісоль і король нюйоркской богемы та піонєр поп-арту Енді Варголь сут презентуваны вєдно на выставі. Експозиция «Marisol and Warhol Take New York» є як раз тепер вказувана в Музею Енді Варголя в Пітсбурґу. Мож єй видіти пару місяців, бо до 14. квітня/апріля 2022 рока. На выставі мож видіти найважнійшы творы Марісоль выпожычены з найвекшых світовых колекций, а тіж культовы роботы Варголя, його фільмы, котры были рідко вказуваны публиці, та архівальны материялы. Експозиция з Пітсбурґа повандрує до Артистичного Музею Перес в Маямі в квітни/апріли 2022 рока.