Приносиме вам сумар медияльной ґрупы ЛЕМ.фм+ на ден 16. липця/юлия
2020 р.
Церков в Поворознику заперта для одвиджаючых
Як сме інформували, од 3. липця/юлия рушыла тогорічна едиция проєкту «Одкрытый Пут Деревяной Архітектуры» в Малопольщы. Посеред многых церкви Лемковины іщы до понеділька, 13. липця/юлия, мож было одвиджати більше як 400-річну церков з Поворозника. На жаль, на тоту хвилю одвиджаня памятковой церкви св. Якова не єст можливе. На офіцийным сайті святыні в Поворознику подано, же в родині провідника та опікуна церкви находит ся особа хвора на Covid-19. В часі жданя на результаты досліджынь на присутніст віруса в провідника та для безпекы туристів одвиджаня церкви было стримане. Деревяну церков з 1604 р., актуальні римокатолицкій костел, в 2013 р. вписано на Світовый Список Спадковины ЮНЕСКО. Што рока одвиджат обєкт близко сорок тисячы люди.
Вакацийный автобус з Меджелабірців до Свидника
Крайска Орґанізация Туристичного Руху Пілнічно-Східньой Словациі разом з партнерами зрыхтувала вакацийный автобус, котрый курсувал буде в кажду пятницю, суботу і неділю од 3. липця/юлия до 6. вересня/септембра медже Меджелабірцями і Свидником. Його траса безпосередньо лучыт ся желізницьовом ленійом Санок-Лупків-Меджелабірці, котру обслугує словацка желізниця. Такє розвязаня дозволит туристам з Польщы на одвиджаня та познаня істориі, культуры ци архітектуры пілнічно-східньой Словациі. Пряшівскій край знаный єст зо свого культурового богатства. Серед плянуваных пристанків туристичного автобуса находит ся вельо інтересуючых атракций, не лем для польскых, але і словацкых туристів. Буде мож видіти деревяны святыні, Музей Енді Варголя ци Войсковый Музей в Свиднику. Пілнічно-східня обшыр Словациі то територия, де жыє найбільше чысло Русинів на Словациі. Ціла прогулька коштує лем 3€ за особу.
Новый ведучый Уряд про Словаків жыючых заграницьом
Як інформувала словацка державна пресова аґентура TASR, словацкы власти в середу, 15. липця/юлия, выбрали нового ведучого Уряду про заграничных Словаків – Мілана Яна Піліпа. Уряд про Словаків жыючых заграницьом забезпечат з Міністерством Заграничных Справ і Европейскых Справ Словацкой Республикы выконуваня державной політикы взглядом Словаків, котры жыют за границями, і державну підпору краянів. Мілан Ян Піліп єст долголітнім русиньскым активістом. Закінчыл політолоґію і філософію на Філософічным Факультеті Пряшівского Університету. Дотепер працувал в Міністерстві Обороны Словацкой Республикы. Єст ведучым Містной Орґанізациі Русиньской Оброды на Словациі в Братиславі. Брал участ в творіню Округлого Стола Русинів Словациі. На тоту хвилю єст членом президиюм ОСРС, в функциі секретаря. Од грудня/децембра 2015 рока єст єдным з двох представників русиньской меншыны в Выборы про нацийональны і етнічны ґрупы, а од 2019 єст віцеведучым того выбору. В році 2014 выдал книжку під наголовком «Русиньска народна сімболіка». Сердечні ґратулюєме!
З Вроцлавя до Скального Міста
Нижньошлезска Желізниця вернула получыня Adršpach, де находит ся Скальне Місто. Од 4. липця/юлия з Вроцлавя зас можна ся достати до чешского місточка Адршпах. Ранній потяг на своій трасі затримує ся м.ін. в Жарові, Шлезскій Явожыні, Валбжыху ци Єленій Горі. Потяг вырушат рано о годині 5.46, што дозвалят на цілодньове обзераня Скального Міста. Власти нижньошлезской желізниці задбали тіж о поворот пасажерів. І так вечером мож назад вернути спокійні до Вроцлавя.
Коментарі