Сумар дня на 16. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 16. лютого/фебруара 2021 р.

На Словациі зачал ся повселюдный спис

Од вчера, 15. лютого/фебруара, до 31. марця списуваня на Словациі проходит в електронічній форміі. Формуляр, котрый находит ся на сайті www.scitanie.sk, можна выполнити аж в пятьох меншыновых языках: в мадярскым, ромскым, русиньскым, украіньскым і німецкым, а пак можна го стягнути як файль pdf з потверджыньом о списаню. На кінци формуляря находят ся звіданя про нацийональніст, материньскій язык і віроісповіданя. Сут то звіданя чысла 10 – про нацийональніст, 12 – материньскій язык і 13 – віроісповіданя. Діти, котры не скінчыли іщы 18-ох років, списуют ся разом з родичами. Тоты, што не можут ся самы електронічні списати, можут попросити о асистенцию. Асистуване списуваня буде проходило од 1. квітна/апріля до кінця жолтня/октобра тр. Статистичный Уряд Словацкой Республикы звертат увагу, же вшыткы жытелі Словациі мают повинніст ся списати, а недостосуваня ся горозит санкциями. Tогорічне списуваня жытелів єст найкоротшым, як ходит о час, в істориі. Каждый выполнят лем одповіди на тринадцет звідань. Списати ся можна в каждій хвили через компутер, смартфон або таблет. О списаня ся апелює полномічный влады Словацкой Республикы про нацийональны меншыны Ласло Буковскій. Як написал, результаты спису будут мати влияня на будучніст меншын, зато зверат ся до вшыткых жытелів, жебы взяли участ в списі і не бояли ся признати до свойой нацийональности і материньского языка.

Пивнична буде головным містом Фестівалю Бігів

Шторічный Фестіваль Бігів остає на сандецкій земли, але його серце уж не буде в Креници. Як поінформувал презес Заряду Соспільно-Культурного Товариства «Сандеччан» Зиґмунт Бердиховскій, головным містом фестівалю буде Пивнична. Траса на 100 км буде така як в попередніх роках, з том ріжницьом, же не буде ся кінчыла в Креници. На тій трасі пройдут тіж інчы змаганя в бігах на 64, 34 і 22 км, при чым початок і закінчыня каждой з трас находит ся в інчым місци. Як каждого рока, орґанізаторы старают ся збогатити фестіваль дальшыма атракциями, того рока в плянах сут Кулінарный Фестіваль, пошыріня стрефу EXPO і більша презентация сандецкой культуры. 12. Фестіваль Бігів пройде в вересни/септембрі тр.

«RTM по ґорлицкы» змаганя для любителів бігів в час пандеміі

Добра відоміст для любителів бігів. Хоц час пандеміі міцно ограничыл ріжного рода акциі, то Біциґльовый Клюб «Grupetto» Ґорлиці і Склеп «Остре Колесо» просят на віртуальны змаганя. Івент має назву «RTM по ґорлицкы», а то значыт, же каждый з трьох етапів пройде на обшыри ґорлицкого повіту. Першый етап находит ся в Ґорлицях і тырвал буде до 21. лютого/фебруара, другій в Липинках до 14. марця. Не знатя іщы, на якій трасі пройде фінал акциі. Участ єст проста, треба лем одкрыти конто на сайті www.ratemytrail.com, а пак кажду з трас зробити з GPS і заладувати файль на страну змагань. Для найліпшых зрыхтуваны сут нагороды. В своій выповіди для порталю Nasze Miasto Gorlice, презес Біциґльового Клюбу «Grupetto» Ґорлиці і орґанізатор Ґорлицкых Гірскых Бігів, Себастиян Хладна, заповіл тіж, же ювілейна 5. едиция змагань пройде 14. листопада/новембра.

Нова театральна ґрупа в Устю Рускым

Ґмінный Осередок Культуры в Устю Рускым просит молодіж і дорослых мешканців ґміны до ново основаной театральной ґрупы. Занятя вела буде Моніка Бабуля, акторка і жытелька ґміны Уста Рускє. Перша орґанізацийна стріча пройде в суботу, 20. лютого/фебруара, о годині 17.00 в шкільній аули.