Сумар дня на 16. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 16. вересня/септембра 2021 р.

Делеґация Русинів на стрічы з папом Франциском

В понедільок, 13. вересня/септембра, в загороді Президентского Палацу в Братиславі одбыло ся Поздоровліня папы Франциска при нагоді його апостольской візиты на Словациі. Президентка Словациі на тоту вызначну подію запросила і делеґацию Русинів. Творили єй Петро Медвід, член порадного орґану про меншыны президенткы СР за Русинів, председа Округлого Стола Русинів Словациі Петро Штефаняк, председа Русиньской Оброды на Словациі Мартін Караш, председа орґанізациі молоды.Русины Марек Гребік і отец Франтішек Крайняк, ініциятор і автор русиньскых літургічных перекладів. Участ брал і дальшый Русин, Мілян Ян Піліп за Уряд про Словаків жыючых заграницьом. Русиньска делеґация оцінила, же при так вызначній історічній подіі, яком є стріча Папы на Словациі, не забыло ся ани на Русинів.

Папа проводил грекокатолицкым богослужыням в Пряшові

В віторок, 14. вересня/септембра, папа Франциск переводил в Пряшові візантийскій літургіі св. Йоана Златоустого. Были на ній присутны грекокатолицкы єпископы і священникы. Грекокатолицку церков на Словациі представлял архієпископ і митрополита пряшівскій Йоан Бабяк. Присутны были владыкы і дальшых сусідніх церкви, в тым Мукачівской Грекокатолицкой Єпархіі. Вчас літургіі звучали і молитвы по русиньскы. Папі одспіване было русиньскє Многая і благая літа.

Молитвы при памятнику Талергофців

В суботу, 11. вересня/септембра, были служены молитвы при памятнику Талергофців і св. Максима Ґорлицкого в селі Чорне на Лемковині. Молитовно были спомянути жертвы лаґру в Талергофі і возношены благаня до св. Максима. Богослужыня очелювал о. Володислав Канюк, православный креницкій декан. Ґорлицкій декан, о. Роман Дубец, розповіл про історичны факты повязаны з чорняньскым памятником. Присутный был Димитрий Сабатович, вірный ґорлицкой парохіі, якій в 1934 р. як хлопец витал владыку кременецкого Симеона. Товды посвячыня памятника згромадило бл. 8 тис. вірных з Лемковины.

Інвентаризация церковных дзвонів

Клюб Любителів Лемковины інформує, што як раз реализує проєкт, якій має за ціль інвентаризацию церковных дзвонів в храмах на Лемковині. Волонтеры заходят до лемківскых церкви, фотоґрафуют дзвоны, міряют іх і під оком знавці – Збіґнєва Фельчыньского – роблят детальны описы. Результаты досліджынь представлены будут в брошурі.