Голосник

Сумар дня на 16. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 16. жолтня/октобра 2020 р.


Бесідували м.ін. про меншыновый закон

Полномічный влады Словацкой Республикы про нацийональны меншыны Ласло Буковскій в віторок, 13. жолтня/октобра, в просторах Міністерства Заграничных і Европейскых Справ стрітил ся з шефом словацкой дипломациі Іваном Корчоком. Урядникы бесідували м.ін. про рыхтуваный закон о нацийональных меншынах, котрый має рефлектувати актуальны вызвы і потребы нацийональных меншын. Полномічный ініциювал на стрічы зліпшыня соспільного поступу при аплікациі в практиці меншыновых языковых прав згідні з Картом Реґіональных або Меншыновых Языків. Уряд влады премєра Ігоря Матовича принял своє Проґрамове Выголошыня 19. квітня/апріля тр. В документі власти ся зобовязали приняти закон про нацийональны меншыны. Додатково, поміщеный є тіж запис про замір покликаня Уряду про Нацийональны Меншыны, жебы дати можливіст хоснувати членам меншын конституцийне право брати участ в рішаню публичных справ.

Дослідникы про А. Годинку, так само науковця – історика, філолоґа, фольклористу, Русина.

В Росийскым Центрі Печского Університету на Мадярах 10. жолтня/октобра проходил округлый стіл присвяченый особі бывшого ректора університету і декана Выділу Гуманістичных Наук Антония Годинкы. З рефератом выступила м.ін. проф. Марта Фонт, котра підкрислила, што Годинка был Русином, істориком, філолоґом, фольклористом, публицистом і членом Мадярской Академіі Наук. Припомнула, што Антоний Годинка был енциклопедичным вченым – славістом, і што в центрі його досліджынь были м.ін. темы звязаны з історийом славаньско-мадярскых повязань і походжыня Русинів. По выступліню проф. Фонт прошла дискусия, в котрій взяли участ представникы університету та м.ін. Штефан Лявинец, председа Світового Конґресу Русинів і Всемадярского Общества Інтеліґенциі Русинів ім. А. Годинкы. Участинкы округлого стола мали можливіст зазнаємити ся тіж з роботами Годинкы. На конец зложыли вінец під пропамятном таблицьом Антония Годинкы, яка містит ся на стіні університецкого будинку.

Нагородили ґорлицкій фестіваль і місто Ґорлиці

Перед трьома днями в Бенедиктиньскым Аббатсві в підкраківскым Тынци прошла ґаля Малопольского Празднуваня Світового Дня Туристикы, вчас котрой признали Почестны Одзначыня Міністрса дс. Туристикы «За заслугы для туристикы», Грамоты Маршалка Малопольского Воєвідства за вклад в розвиток і промоцию туристикы та нагороды в плебісциті «Туристичны Скарбы Малопольщы 2020». Нагороды признали в парох катеґориях, за найбарже выняткову туристичну подію вырбали Фестіваль 4 Страны Карпат, якій од парох років проходит на ґорлицкым рынку і презентувана є на ним шыроко понята карпатска музика. Місто Ґорлиці отримало тіж выріжніня в катеґориі Місце з климатом. За найбарже інтересуючый туристичный пут выбрали Velo Dunajec, а выріжніня достали «Śnieżne Trasy przez Lasy», то 80 км трас для слідовой ізды на лыжах в околици Кривой і Баниці. Лавреаты і выріжнены будут обняты промоцийном кампанійом реалізуваном Малопольском Туристичном Орґанізацийом.

В соймі про лемківску меншыну – ПОСІДЖЫНЯ ОДКЛИКАНЕ

В найблизшый віторок, 20. жолтня/октобра, в будинку польского Сойму пройде засіданя Комісиі Нацийональных і Етнічных Меншын. В порядку засіданя є розсмотріня інформациі Міністра Внутрішніх Справ і Адміністрациі про ситуацию і проблемы лемківской меншыны в Польщы, розсмотріня інформациі Міністра Нацийональной Едукациі про стан едукациі лемківской меншыны в Польщы та розсмотріня проєкту дезидерату в справі ситуациі білоруской меншыны в Польщы. Вшыткы охочы будут мочы прислухувати ся засіданю, буде бо оно трансмітуване онляйн, черз сайт sejm.gov.pl.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі