Сумар дня на 17. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 17. грудня/децембра 2019 р.

Конец полюваня на волкы

15. грудня/децембра закінчыл ся словацкій сезон полювань на волкы. Были они можливы на териториі цілой Словациі аж до 2015 рока, од того часу на европейскій хороненій обшыри Натура 2000 і Нацийональных Парках был рішеный цілковитый заказ полювань. Того рока дано згоду на одстріліня 35 волків. Од 1. листопада/новембра до неділі, 15. грудня/децембра, при граници Татряньского Нацийонального Парку, в околицях Попраду, Липтовского Микулаша і Ружомберку, забито аж 12 волків. Як підкрислят директор парку Pavol Majko, єст то барз велика страта дла того реґіону, де чысло популяциі не єст аж так великє. Рахує ся, же на териториі цілой Словациі находит ся од 300 до 600 волків. Выбияня тых звірят веде до зменшыня ґенетичной ґатунковой пулі волків, а вкінци до хворіт. Волкы полнят тіж важну функцию в екосистемі, бо сут зобліґуваны до селекциі популяциі диків і сарен. Дискусиі в справі цілковитой охороны волків тырвают. Проти сут головно ґаздове, котры скаржат ся на шкоды спричынены волками, як і міністерсво, подля котрого чысло популяциі волків єст стабільне, а полюваня не будут мати неґативных результатів.

Русиньска нематерияльна спадковина на списку ЮНЕСКО

12. грудня/децембра в Боґоті в Колюмбіі проходило XIV засіданя Меджеурядового Комітету до справ Охороны Нематерияльной Спадковины ЮНЕСКО, де до списку дописано дальшу позицию – Дротарство – ремесло і кумшт. Номінацию дротарства на листу ЮНЕСКО зложыл уряд Словациі, делеґация котрого явила ся на і засіданю. Комісия мусіла выбрати з більше як 40 пропозиций лем в катеґориі нематерияльной культуровой спадковины, окрем того 3 номінаций до списку найліпшых практик охороны нематерияльной спадковины і 6 номінаций до списку в ситуациі кризы і загорожыня. Дротарство розвивало ся по словацкій страні на Ораві, на Спишы в Великым Липнику і Камюнці, а по польскій страні Карпат на Шляхтівскій Руси в Білій Воді. Дротарі ходили од села до села і при помочы простых технік выгынаня дротів головно направяли горці і горнята. Актуальні дротарскє ремесло ограничат ся лем до чысто артистичной формы.

Мож здобыты грошы на плеканя лемківской культуры

Рушыл новый набір до проґраму ЕтноПольска Нацийонального Центра Культуры. Внескы будут приниманы до 15. січня/януара 2020 рока. Цілю проґраму єст творити обставины для підтримуваня культуровой достоменности і участ в культурі на локальным і реґіональным рівнях. Проєкт направленый єст головно на обшыр, де прожыват менше як 50 тис. мешканців. Його задачаом єст тіж створити обставины до едукациі на тему культуры і популяризация материяльной і нематерияльной спадковины. ЕтноПольска оферує тіж підпору для ансамблів в формі дополніня народных облечынь, потрібных інструментів та іншых потрібных реквізитів. В тогорічній едициі акциі дофінансуваня отримал м.ін. Лемківскій Ансамбль Пісні і Танця «Кычера». Як інформували сме уж якісый час тому, інвестиция тыкат реконструкциі святочных облечынь Лемків м.ін. з Боднаркы, Команчы і Завадкы Рыманівской.

PKP з новым розкладом

Од неділі, 15. грудня/децембра, в містах підкарпатского воєвідства обовязує новый розклад ізды Польской Державной Желізниці. Спричынене єст то одкрытьом новых получынь медже інчыма до Відня і Ґрацу в Австриі і Остравы в Чехах, та збільшыня чысла державных получынь. Два новы получыня то потяг IC Porta Moravica, котрый свою трасу зачынат в Перемышли, пак іхат через Краків до Остравы, Відня і Ґрацу, та потяг EIC Banach реляциі Перемышль-Ґдыня. Окрем того одкрыты будут безпосередні получыня до Быдґощы і много получынь до Кракова і Варшавы.