Сумар дня на 17. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 17. грудня/децембра 2021 р.

Стріча робочой ґрупы до справ системы освіты меншын

В четвер, 9. грудня/децембра, в Варшаві прошла ІІ стріча робочой ґрупы до справ системы освіты нацийональных і етнічных меншын та соспільности хоснуючой реґіональный язык. Стріча проходила в гыбридовій формі. Брали в ній участ урядникы Міністерства Едукациі і Наукы, представник Міністра Фінансів, урядникы Департаменту Реліґійных Віроісповідань і Нацийональных і Енічных Меншын Міністерства Внутрішніх Справ і Адміністрациі, та члены робочой ґрупы, в тым члены Спільной Комісиі Уряду та Нацийональных і Етнічных Меншын. Представникы меншын вказали на потребу модифікациі системы освіты меншын, так жебы давала ліпшы условія для підниманя діянь для захованя достоменности меншын. Бесідуваны были темы введіня механізмів заохочаючых до вчыня меншыновых языків і збільшаючых іх значыня в дальшій едукациі учеників, потребы запевніня підручників для вчыня языків меншын, основаня на загальнопольскым рівни системы до зліпшаня кваліфікаций учытелів меншыновых языків, реґуляциі фунґуваня меджешкільных ґруп вчыня языків меншын ци реґуляциі статусу меншыновых шкіл. Звернули і увагу на потребу імплементациі Европейской Карты Реґіональных або Меншыновых Языків та транспарентного фінансуваня вчыня языків меншын.

Конкурс оферт на опрацуваня документациі для Аґломерацийной Желізниці Мідьового Басену

Як подає ґміна Польковиці, Нижньошлезска Служба Доріг і Желізниці во Вроцлаві оголосила конкурс оферт на опрацуваня передпроєктовой документациі для Аґломерацийной Желізниці Мідьового Басену. Подля експертів і представників самоурядів то важный етап на пути ґу одкрытю желізницьового получыня Любін – Польковиці – Ґлоґів, што приверне Польковиці на желізницьову мапу Польщы. Опрацувана документация вкаже м.ін. кади буде вела нова желізницьова ленія, якы буде мала технічны параметры та в якых місцях найдут ся пристанкы. На тій основі легше буде плянувати дальшый розвиток мобільности, особливо публичного транспорту в ґміні Польковиці. Як бесідує бургомайстер Польковиц Лукаш Пузнєцкій, тепер ведены будут м.ін. громадяньскы консультациі цілю выпрацувати розвязаня тыкаючы трасы леніі ци локализациі пристанків, найкорыстнійшых для жытелів ґміны Польковыці, як і цілого Мідьового Басену. Документация має быти готова до кінця 2023 рока.

Провіряна якіст повітря в Креници

Тырват остатній етап акциі Малопольща без смоґу, орґанізуваной Радийом Краків разом з Польскым Смоґовым Алярмом. Головным партнером акциі являт ся Еко Малопольща. Посліднім місцьом, де од 7. грудня/децембра провіряна єст якіст повітря, єст Крениця. Як заявляют орґанізаторы, результаты сут барз добры. Што найважнійше, ситуация не єст для того курорту выняткова. Як бесідує бургомайстер Крениці Пьотр Рыба, протягом остатніх 2 років в Креници ани раз не однотувано высшого як норма рівня шкідливого пылу в повітри, чым ся курорт выріжнят на фоні інчых. Аж 95% хыж, готелів і санаторий в курорті хоснує ґазову сіт, так само в околичных місцевостях, такых як Тылич ци Мохначка. Креницкє повітря буде бадане іщы до 20. грудня/децембра. На конец пройде дебата про результаты акциі.

Неодолга буде завершена будова інгаляториі в Ґорлицях

Неодолга завершена буде будова ґорлицкой солянковой інгаляториі. Тепер на деревяну вельокутну конструкцию кладены сут голузкы тернины. Вколо обєкту буде задашеный пляц, де солянкова гмла, возникаюча по розбитю капель солянкы ідучых по тернині, буде мала найвекшу концентрацию. Інгалятория была запроєктувана так, жебы солянка не влияла на довколишнє середовиско – конструкция была поставлена на неперепущаючій воду плыті полученій з запертом інсталяцийом і герметичным резервуаром, завдякы чому солянка не достане ся до землі. Зато концентрация солянковой гмлы, котра ся може достати поза обєкт, буде за низка, жебы неґативно влияти на окружаючы дерева.