Сумар дня на 17. квітня 2026 р.

Приносиме вам сумар медияльной ґрупы ЛЕМ.фм+ на ден 17. квітня 2026 р.

Онляйнова стріча посвячена «Контекстуальному словникови лемкiвского языка»

В найблизшый понедільок 20. квітня/апріля одбуде ся дальша стріча посвячена «Контекстуальному словникови лемкiвского языка». Подія пройде в онляйновій формі, початок о 10.00 год. Стрiчу орґанiзує Комісия про Славяньскы Мікроязыкы Медженародного Комітету Славістів. Спілорґанізатором єст м.ін. Славяньско-Евроазийскій Дослідничый Центр з Університету Гоккаідо в Японіі. Участ в дискусиi возмут: редакторка словника – др габ. Олена Дуць-Файфер, проф. Генрик Фонтаньскiй i др габ. Томаш Вiхеркєвич. Жебы мочы долучыти до стрiчы на Zoom, треба ся зареґiструвати при помочы мотузка.

Рушат ревітализация Парковой Горы в Креници

В Креници рушат долгождана модернізация Здройового Парку, што веде на верх Парковой Горы. Якісый час тому ґміна здобыла вшыткы консерваторскы позволіня на ревітализацию Парковой Горы. Тепер терен під реализацию задачы был переданый выконавци. За бурогомайстром Крениці – Пьотром Рыбом, ревітализация має привернути тому місци давный блеск і спричынити, што буде оно іщы барже атракцийне для жытелів і туристів. В плянях єст м.ін. перебудуваня спацеровых стежок. По ремонті має быти безпечнійше, выгіднійше і красше. Проєкт передвидує замонтуваня нового освітліня, кошів і лавок, новы насаджыня і одновліня забытковой альтаны, а на вершку горы найде ся выняткова пчоляча закутина. Крениця позыскала на тоту інвестицию 9,5 млн злотых дофінансуваня з проґраму Европейскых Фондів для Малопольщы 2021-2027. Цілковитый кошт прац то понад 12 млн злотых. Працы на Парковій Горі рушают уж в тым тыжни, а іх завершыня єст плянуване на 30. червця/юнія 2027 р.

Як розвивати лемківскій язык? Стріча з дослідниками в Рускій Бурсі в Ґорлицях

А уж днес в Рускій Бурсі в Ґорлицях проходит стріча посвячена лемківскому языкови пн. Як розвивати лемківскій язык? Вчыня, материялы і інспірациі. Презентация о можливостях і потенцияльных методах вчыня лемківского языка – ци то в рамках формальной едукациі ци поза школом. Стріча має быти нагодом до того, жебы подумати над тым, як творити і хоснувати материялы, котры реальні підперают розвиток языковых компетенций в нашым середовиску. Презентацию выголосят дослідникы Варшавского Університету і Університету Адама Міцкєвича в Познані: Аґнєшка Отвіновска-Кателяніц, Анна Щепаняк-Козак, Емілия Вонсікєвич-Фірлей і Томаш Віхеркєвич. Підчас прелекциі представлены будут інспірациі і практичны розвязаня, котры можут помочы в будуваню і підпераню языковых ресурсів – дома, в спільноті, культурі ци діґітальным просторі. Стріча орґанізувана єст в рамках медженародного проєкту Fosterlang, якого цілю єст підтримуваня языковой ріжнорідности і розвиток меншыновых языків. Початок стрічы о 17.00 год. Красні просиме вшыткых заінтересуваных лемківскым языком, едукацийом, культуром та модерныма методами підтримуваня вельоязычности.