Голосник

Сумар дня на 17. липця/юлия 2020 р.

Приносиме вам сумар медияльной ґрупы ЛЕМ.фм+ на ден 17. липця/юлия
2020 р.


Вмер єпарха Мукачівской Грекокатолицкой Єпархіі – владыка Мілан Шашік

В віторок, 14. липця/юлия, вечером одышол до вічности єпарха Мукачівской Грекокатолицкой Єпархіі – владыка Мілан Шашік. Причыном смерти была тромбоза. Владыка Мілан Шашік вродил ся в 1952 році в селі Легота в окресі Нітра на Словациі. Студиювал на Римокатолицкым Кірилометодийскым Богословскым Выділі в Братиславі. Рукоположеный на священника был в 1976 році. З позволіньом Святійшого Престола, зато што все інтересувал го східній обряд, служыл в обох – візантийскым і латиньскым. В 90. роках ХХ ст. студиювал на Папскым Теолоґічным Інституті Терезиянум в Римі. Папа римскій Йоан Павел ІІ в 2002 році выменувал го за дочасного апостольского адміністратора Мукачівской Грекокатолицкой Єпархіі і за титулярного Єпископа Бононьского. Єпископскє рукоположыня принял од Йоана Павла ІІ в Римі в 2003 році, а в 2010 был выменуваный папом римскым Венедиктом XVI за мукачівского єпарху. В послідніх роках консолідувал обставины в Мукачівскій Грекокатолицкій Єпархіі, основал новы парохіі, збудувало ся множество новых храмів. Владыка вмер маючы лем 68 років.

Рекордове чысло домашніх туристів в Музею Енді Варголя в Меджелабірцях

Директор Музею Енді Варголя в Меджелабірцях, Мартін Цубяк, повіл в бесіді для аґенциі TASR, што од початку тогорічных вакаций до музею пришло рекордове чысло словацкых туристів. В минулым найчастійшыма гістми в музею были туристы з Польщы, пак жытелі інчых европейскых держав. Директор Цубяк великє чысло домашніх туристів видит як ефект промоцийной кампаніі, котру музей зачал вести іщы вчас пандеміі. Окрем творчости Варголя і артефактів звязаных з його жытьом, в музею в тым сезоні мож буде видіти експозицию пн. «Radiant World» – то творчіст Кіта Гарінґа, якій в своій штуці занимал ся темами Апартеіду, епідеміі AIDS ци проблематиком люди завислых на наркотиках. Запрезентуют 40 творів, буде то найбільша експозиция того творці на Словациі. Одкрытя выставы пройде 21. липця/юлия. Дальшыма ініциятивами музею будут подіі ведены в рамках проєкту Stage. 23. липця/юлия занимати ся будут стрітартовом артистком Бамбі і єй музом Еймі Вайнгаус, а штырі дни пізнійше бесідувати будут про Міка Джеґера.

Цеголка на ремонт олтаря в церкви в Святковій Великій

Од парох років тырват ремонт лемківской церкви в Святковій Великій. З той причыны орґанізуваны были розмаіты подіі, жебы зберати потрібны грошы. Найбільшом таком шторічном благодійном імпрезом была Крампняньска Історична Парада, котра зо взгляду на коронавіруса того рока не буде орґанізувана, а конечне є зобрати грошы на выремонтуваня головного олтаря. Памятник єст фурт нищеный через овады, а тіж скорше неодповіднє діяня чловека. На сайті zrzutka.pl Фундация ім. Ґенерала Пулаского зорґанізувала соспільну колекту грошы потрібных на реновацию олтаря. Завдякы дотеперішнім стараням вельох ентузиястів повело ся выремонтувати будинок святыні, привернути зовнішню кольористику, одновити богату поліхромію середины і одновити бічный олтарик. Ремонт головного олтаря є в тым моменті найбільшом і найпильнійшом потребом. Квота, яку хоче зобрати Фундация, то 30 000 зл. На тоту хвилю є лем 100 зл.

Што робити, коли стрітиме медведя?

Прогулька в горы то не лем выпочынок і красны ландшафты. Мусиме рахувати ся і з небезпеком, а єдном з них є стрітити на шляку прогулькы медведя, што може трафити ся і на Лемковині. Медведі то драпіжны і небезпечны звірята, мают знаменитый нюх і слух, знают ся скоро переміщати, плывати, выходити на дерева і скалы. Коли трафит ся нам быти близко, то по перше: не мож панікувати, як лем є тото можливе в міру спокійні одыйти, николи скоро не втікати, не робити знимок ани фільмиків. Кєд мимо вшытко медвід іде в нашу страну, треба положыти ся на земли і звинути. Найчастійше звіря подумат, же загороза минула і піде дале. Треба тіж памятати, жебы не підносити ся одраз, але аж як медвід одыйде. Желаме лем такых прогульок, на котрых не стрітите медведя.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі