Сумар дня на 17. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 17. листопада/новембра 2022 р.

Лемківска стріча в краківскым Палаци Потоцкых

Уж в найблизшу неділю, 20. листопада/новембра, в краківскым Палаци Потоцкых одбуде ся істо лемківска подія. Буде то стріча, в часі якой буде мож познати ґенезу і приметы антолоґіі лемківской поезиі під назвом: Ritorni / Powroty / Вертаня – першого опрацуваня по італияньскы посвяченого як раз нашій літературі. Стрічу буде вела наша редакцийна камаратка і ведуча Стоваришыня «Руска Бурса» в Ґорлицях, Наталия Малецка-Новак, яка зрыхтувала тлумачыня пословія до реченой збіркы. Вєдно з присутныма побесідує она м.ін. о тым, яку ролю в ратуваню спільнотовой памяти може мати музика ци як з літературы родит ся діалоґ, котрый зближат люди о ріжным походжыню. Гістми стрічы будут: Сільвія Бруні, авторка опрацуваня книжкы і тлумачынь вершів, проф. Олена Дуць-Файфер, авторка вступу до книжкы, та онляйн участ возму Сімона Оттоленґі i Роберто Ґабрієле, авторы знимок, якы найдете в публикациі. Початок недільной стрічы о 16.00 год.

6. Фестіваль Музикы Нацийональных і Етнічных Меншын

В днях 21.-23. листопада/новембра в варшавскым студентскым клюбі Стодола одбуде ся уж 6. едиция Фестівалю Музикы Нацийональных і Етнічных Меншын Польской Республикы. Його цілю є припомніня і вказаня влияня інчых нацийональности на польску культуру і достоменніст. Вчас тогорічной едициі буде мож почути украіньску, ромску і жыдівску музику. Подія є фінансувана з середків Міністерства Культуры і Нацийональной Спадковины. Фестіваль орґанізуваный є во спілпрацы з Нацийональным Центром Культуры. В першый ден подіі будут выступувати Козак Систем і Даґадана. Дальшы два дни то стріча з циґаньском і жыдівском музиком. В попередніх едициях мож было выслухати і лемківску музику.

Свидник має своі новы пріоритеты

Будуваня мешкань до наниманя і прирыхтуваня пляців під будову родинных домів сут медже пріоритами міста Свидник на Словациі в новым функцийным періоді. Місто заєдно хоче реализувати проєкты, котры уж отримали дофінансуваня. Сут то м.ін. проєкт реґенерациі і реконструкциі внутроблоку праві в центрі міста, котрый має змінити ся на оддыхову зону. Роботы мали бы зачати ся на яр будучого рока. Дальшым проєктом є примірно выбудуваня социяльного центра на Фестівальовій улици, котра находит ся коло свидницкого амфітеатру. За словами пріматоркы міста Іванчовой, в попереднім періоді єй урядуваня місто зреконструувало історично найвеце ходників, доріг, вытворило ся близко 80 місц на паркуваня. Подарило ся і ограничыти кількіст комунальных одпадів. В минулым функцийным періоді Свидник мал успішны проєкты за близко 5 млн евро. В середнім чыслі розрахунок міста то коло 10-11 млн на рік.

210. років од будовы церкви в Грабівчыку

В минулу неділю, 13. листопада/новембра, в русиньскым селі Грабівчык на Пряшівскій Руси одбыл ся в тамтышній грекокатолицкій парохіі одпуст з нагоды храмового праздника святого Михаіла. На одпуст принял запрошыня і владыка Петро Руснак, апостольскій адміністратор пряшівской архієпархіі. В його рамках вірны припомнули собі 210. річницю посвячыня храму. Церков была в середині выремонтувана, а посвятил ю прибывшый на подію владыка.