Голосник

Сумар дня на 17. лютого/фебруара 2020 р.

Приносиме вам сумар медияльной ґрупы ЛЕМ.фм+ на ден 17. лютого/фебруара 2020 р.


Малопольскы Капличкы 2020

Тырват конкурс до проґраму Малопольскы Капличкы 2020. Єст він направленый на єдиниці територияльного самоуряду в малопольскым воєвідстві, якы піднимают консерваторскы, реставраторскы або будівляны працы при памятковых капличках находячых ся на обшыри малопольского воєвідства. Цілю конкурсу єст сохранити для будучых поколінь вартістны обєкты, што сут важным елементом культуровой спадковины Малопольщы. Капличкы, котры находят ся на приватній обшыри, тіж можут рахувати на одновліня, при спілпрацы властителя з єдиницьом територияльного самоуряду. Обєкты не мусят быти вписаны в реґістер памяток малопольского воєвідства або ґмінны евіденциі памяток, але повинны ся одзначати артистичном та історичном вартістю. Єден внескодавця може зложыти два внескы, але каждый мусит ся односити до інчого обєкту. Максимальна квота дофінансуваня то 25 тис. зл, але не більше як 60% коштів реалізациі цілости прац. До внеску треба долучыти лем кошторис робіт і знимкы. Документацию мож складати до 13. марця того рока. До той поры, завдякы дофінансуваню в высокости 4 млн зл, повело ся привернути давный блеск більше як 470 обєктів.

«Ікона і абстракция»

В пятницю, 21. лютого/фебруара, в девяту річницю смерти проф. Юрия Новосільского, в Кракові одзначат памят о артисті. Подія зачне ся торжественном панихідом на гробі маляря на Раковицкым Цмонтери при Алеі Заслуженых о год. 16.00. Пак в краківскій православній церкви Успіня Пресвятой Богородиці при ул. Шпытальній 24, од годины 17.30, буде проходила конференция пн. «Ікона і абстракция». Буде мож выслухати выкладів о. Генрика Папроцкого на тему «Абстракция в пониманю Новосільского», др Кристины Черні – «Малярска двоязычніст Новосільского» і «Медже абстракцийом а іконом», доповіди др Ірины Татаровой – «Думка Новосільского о іконі», Віталия Міхальчука – «Абстракция в іконі», та Лукаша Гайдучені – «Абстракция в давній церковній музиці». Давну церковну музику выконат мужскій ансамбль церковной музикы Катапетазма, під дириґентуром Лукаша Гайдучені. Конференциі буде товаришыла выстава абстракций і ікон Новосільского з колекциі Фундациі Новосільского, Ґалериі Стармах і краківской православной парохіі. Орґанізаторами сут Центр Сакральной Штукы ім. Юрия Новосільского та Музей Ікон в Варшаві.

Номінациі до Ліґницкой Книжкы 2019 рока

Знаме уж номінациі до Ліґницкой Книжкы 2019 рока. Номінуваных было шіст выдавництв, выбраных капітулом конкурсу з 24 влонишніх публикаций. Посеред выбраных нашла ся книжка під наголовком «Забыты образы: Лемковина в фотоґрафіях Джона Маслея з років 1923 і 1938 – The forgotten images» в редакциі і опрацуваю Юрия Стариньского. Конкурс од десятьох років єст орґанізуваный Музейом Міди та Ліґницком Публичном Бібліотеком. Капітула оцінювала книжкы звязаны з Ліґницьом, написаны жытельом того міста, або выданы в Ліґници. Переможцю конкурсу познаме на ґали, яка пройде 14. марця в Королівскій Сали Рыцарской Академіі в Ліґници.

«Монашество – сіль днешнього світа»

РесАртіс, Православне Церковне Стоваришыня во Свиднику і Місто Свидник сердечні просят на подію присвячену значыню монашества в минулым і днес – «Монашество – сіль днешнього світа». Подія пройде в четвер, 20. лютого/фебруара, о 17.00 год. в Домі Культуры во Свиднику. В проґрамі стрічы сут презентация документального фільму о жытю в польскым православным монастырі в Турковицях, выклад на тему жытя в сербскых і польскых монастырях, выстава фотоґрафій о жытю монахів і монашок в Сербіі і в Польщы пн. «Чар сербскых монастырів» і «За брамом монастыря». В рамках подіі пройде тіж концерт сестер з монастыря в Турковицях і хору при православній церкви Святой Тройці во Свиднику. Буде тіж презентация новых выдавництв: «Наша віра од кухні» та «Охрідскій пролоґ». Вступне на подію дармо.

Шеруй.

О авторі

Ленка Стефановска

Коментарі