Сумар дня на 17. мая 2021 р.

Приносиме вам сумар медияльной ґрупы ЛЕМ.фм+ на ден 17. мая 2021 р.

В Польщы злегчены рестрикциі

Од минулой суботы, 15. мая, в Польщы обовязує менче рестрикций. Ґастрономічны локалі зас можут принимати гости в своіх зовнішніх зонах. Занятый може быти што другій столик в півтораметровых одступах. Од суботы більше осіб буде могло подорожувати в публичным транспорті. Доступных буде 100% сідячых місц або 50% вшыткых місц – сідячых і стоячых. Наступном зміном єст брак обовязку закрывати ґамбу і ніс назовни. Ограничыня тото дале обовязує в інчых публичных обєктах. Зас дозволена єст орґанізация кіновых сеансів, фільмовых проєкций, діяльніст театрів, опер і фільгармоній назовни і при схоснуваню максимально 50% доступных місц. Домы і осередкы культуры, світлиці, едукацийна і анімацийна діяльніст ведена інституциями культуры під одкрытым небом єст можлива при захованю санітарного режіму. Од суботы, 15. мая, діяльніст на повітри можут взновити і спортовы обєкты – обовязує ліміт 25% публикы. Днес до шкіл вернут тіж старшы ученикы. Гыбридове вчыня буде одкрыте для учеників кляс 4-8 основных шкіл і кляс 1-4 середніх шкіл.

Стоваришыня Карпатка хоче сохранити муры церкви в Мшані

Стоваришыня для Розвитку Карпатского Села «Карпатка» глядат середків на забезпечыня фраґментів мурів, якы ся лишыли з церкви в Мшані. Дотля ощыщено обшыр з кряків, а завдякы переданым ґміном 6 тисячам зл мают ся зачати працы при находячых ся докола церкви памятниках. Члены стоваришыня Карпатка хотят упорядкувати терен і сохранити тото, што остало з забытку, перед знищыньом. Поставлят тіж інформацийны таблиці і вказівкы доізду.

В Креници одтворили Віллю Татряньску

При креницкых Бульварах Дітля, вздолж рікы Криничанкы, находят ся стары ХІХ-вічны віллі. Дві порожні дотля обшыри то місця по знищеных в пожарах Литвинці і Татряньскій. Вілля Татряньска была побудувана в 1855 р., мала товды назву «Під Левом». Будинок в швейцарскым стили згоріл в 1987 році. Тепер туристы і жытелі Крениці можут обзерати нову Татряньску. Одбудовом обєкту заняла ся сандецка фірма Ербет на просьбу приватного інвестора. Будинок был одтвореный і ззовни выглядат як тот ориґінальный, внутрі пенсийонат утриманый єст в климаті 20-тых років ХХ столітя, єднак при схоснуваню модерых розвязань і стандартів.

Трансграничный фотоґрафічный конкурс «Вколо Кременаросу – Чловек – природа – культура»

Бєщадскій Нацийональный Парк просит до участи в фотоґрафічным конкурсі пн. «Вколо Кременаросу – Чловек – природа – культура». Конкурс єст направленый на пасийонатів фотоґрафіі з Польщы і Словациі выже 16 рока жытя. Цілю конкурсу єст заінтересувати познаваньом унікатной природничой і культурной дідовизны сусідуючых нацийональных парків – БНП і НП Полонины. Як припоминают природникы, на познаня бєщадского краєвиду, полонин, лісів і іх жытелів позваляют м.ін. ознакуваны в терені два трансграничны шлякы. Конкурс єст реализуваный в рамках мікропроєкту «При джерелах польско-словацкого погранича – чловек, природа і культура» і орґанізуваный во спілпрацы з Нацийональным Парком Полонины на Словациі. Конкурсовы працы мож присылати до 8. серпня/авґуста тр. Реґулямін конкурсу мож чытати на інтернетовым сайті Бєщадского Нацийонального Парку.