Голосник

Сумар дня на 17. січня/януара 2020 р.

Приносиме вам сумар медияльной ґрупы ЛЕМ.фм+ на ден 17. січня/януара 2020 р.


В парунадцетьох містах Сербіі Русины святкуют

В суботу, 18. січня/януара, пройде центральне святкуваня Нацийонального Свята Русинів в Сербiі. Головны празднуваня пройдут в Шыді. Додатковы подіі присвячены нацийональному дню проходят уж од вчера і днес в інчых містах Сербіі. Ден Русина одсвяткували уж жытелі Бікіча і Вербасу. Цілый ден упамятніня проходят днес в Дюрдьові, Коцурі, Бачынцях, в Новым Орахові, Сримскій Митровици, Рускым Керестурі, Кули і Новым Саді. Центральны праздуваня Дня Русинів в Сербіі зачнут ся заран в Шыді архієрейском благодарном Службом Божом в церкви Преображыня Господнього. На пізне пополудне заплянувано етностіл, вернісаж выставы малюнків і фотоґрафій і святочну академію. Додатково, іщы в неділю, 19. січня/януара, Русины в Бельграді будут мочы взяти участ в святочным проґрамі з нагоды Дня Русинів Сербіі, котрый пройде по Службі Божій о год. 16.30 в церкви Христа Краля в Бельграді. Разом то аж 11 місц, де одпразднуют нацийональне русиньскє свято. Перед місяцьом Русины жыючы в Польщы святкували Ден Русинів в Польщы. Нацийональне свято одзначыло выключні Стоваришыня «Руска Бурса» в Ґорлицях.

Меншыновый язык тіж в аптыках

Словацкій Державный Уряд до справ Контроли Ліків на своій інтернетовій стороні інформує, же меншыновы языкы мали бы быти хоснуваны і в аптиках, а недотримуваня закону треба голосити. В примірі аптик, котры находят ся в містах і селах, де меншыны становлят найменше 20 процент населіня, в языку меншын повинны ся найти інформациі про тото, што має ліценцию на аптику, мено і назвиско ведучого, назва і адрес аптикы, робочый час, але і інформация о тым, хто полнит службу, коли дана аптика є закрыта. Сут то інформациі, котры згідні з законом тыкают ся жытя, здоровля, безпекы або маєтку громадян Словациі і поміщаны в доступных для вшыткых місцях повинны быти коло языка державы і в языку меншыны. Уряд до справ Контроли Ліків сам не контролює, ци аптикы дотримуют тото право, треба безпосередньо до Уряду Полномічного про Нацийональны Меншыны передавати інформациі, де закон не єст дотримуваный.

На Украіні выключні по украіньскы, меншыны не можут по свому

Вчера на Украіні ввошли в жытя переписы нового языкового закону, якы вводят монополь украіньского языка в реклямовій діяльности. Од 16. січня/януара обовязує 32. статя закону «про забезпечыня фунґуваня украіньского языка як державного», принятого в квітни/апріли минулого рока. Згідні з тым записом вшыткій реклямовый зміст в авдийовізуальных і текстовых медиях мусит быти передаваный выключні в украіньскым языку. Перепис закладат, же в примірі середків масового переказу надаючых споза границ Украіны буде мож хоснувати в реклямовых языках єдного з урядовых языків Евросоюзу так само як державного языка Украіны. Можніст хоснуваня в реклямовым переказі языка нацийональных і етнічных меншын жыючых в Украіні має быти реґулювана окремым законом, котрый окрислит права меншыновых спільнот. Закон тот не был іщы схваленый. Проти введіню закону о статусі украіньского языка як єдиного офіцияльного на Украіні найбарже протестувала мадярска держава в імени мадярской меншыны, яка жыє на Закарпатю (є іх 156 тис.). До той поры Мадяры мали право до урядового хоснуваня материньского языка в адміністрацийных єдиницях, в котрых становили сутьову част населіня. Власти Мадяр блокуют тепер контакты медже НАТО а Украіном на высокым політичным рівни, заповідаючы, же буде то тырвало аж до моменту, коли контроверсийый закон быде зміненый.

Путом лемківскых церкви на краківскым університеті

Од початку січня/януара мож в будинку Головной Бібліотекы Технічного Університету в Кракові видіти выставу фотоґрафій Яцка Жепчыньского, котра вказує церкви Лемковины. На експозициі нашло ся 56 знимок вказуючых церкви з обшыри Малопольщы і 15 знимок іконостасів, якы ся в них находят. Покликуюы ся на слова бритийского фотоґрафіка Домініка Русо, што «кольор є вшыткым, але чорне з білым дают веце», автор выставы презентує більшіст знимок в чорно-білій тонациі. Хоче тым самым тіж гейбы вернути до коренів фотоґрафіі, переформляючы кольорову реальніст діґітальной фотоґрафіі до чорно-білой верствы. Подля автора, монохроматичный образ дозвалят одсепарувати неважный, кольоровый фон, жебы зосередити ся на головній темі знимкы. Дополніньом выставы сут іконы зроблены техніком декупажу авторства Ренаты Жепчыньской. Выставу мож обзерати до кінця лютого/фебруара. Електронічна, пошырена версия выставы презентує (окрем знимок, котры мож видіти на експозициі в Бібліотеці Технічного Університету в Кракові) фотоґрафіі вшыткых забытковых церкви Лемковины, ідучы од Шляхтівской Руси через Сандецкій Бескід по Низкій Бескід. Зазерайте на сайт: www.bg.agh.edu.pl/CERKWIE.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі