Сумар дня на 17. січня/януара 2022 р.

Приносиме вам сумар медияльной ґрупы ЛЕМ.фм+ на ден 17. січня/януара 2022 р.

Першы результаты списуваня в Чешскій Республиці

Опубликуваны сут першы результаты списуваня жытелів і мешкань, якє проходило влони в Чешскій Республиці. Даны не сут іщы фінальны, кєд же односят ся лем до выбраных нацийональности і лем до осіб з записаном єдном нацийональністю. Подля першых даных, веце як як 3,3 млн з понад 10,5 млн жытелів не записало собі ниякой нацийональности. Записати свою нацийональніст не было в чешскым списуваню повинне. Тото спричыныло, же Чехів є історично найменше в Чешскій Республиці од 1991 р. Стратили на тым і меншыны. Росли лем штырі меншыны – Украінці, Росияне, Вєтнамці і невызнаны офіцияльно Шлезакы. Окрем штырьох вынятків стратили вшыткы меншыны, в тым і русиньска. Русинів приголосило ся в тым році 608. В 1991 році было іх веце як 1900, в 2001 понад 1 100, а в 2011 было іх 739. Чысло членів окремых меншын може іщы ся збільшыти, кєд будут публикуваны дальшы результаты про люди, якы собі записали другу нацийональніст.

Поправка о приверніню субвенциі на вчыня меншыновых языків принята Сенатом

На остатнім засіданю польского Сенату, якє проходило 11. і 12. січня/януара тр., рішыли о поправках до буджетового закону на 2022 р. Приняли м.ін. поправку о приверніню зменшеной перше Сенатом субвенциі на вчына языків нацийональных і етнічных меншын та реґіонального языка в школах. Закон разом з поправками буде тепер бесідуваный на засіданю Сойму. Жебы речена субвенция в высокости 39 млн 800 тис. злотых была привернена, поправка мусит быти принята Соймом. Кєд бы была одшмарена, субвенция верне до рівня пропонуваного властями в проєкті буджетового закону в вересни/септембрі минулого рока, а квота, о яку зменшено субвенцию, буде презначена на фінансуваня вчыня польского языка в Німцьох. Справа выкликала в Польщы много протестів, о приверніня середків апелюют тепер до Сойму м.ін. представникы кашебской меншыны, якых самоуряды борют ся о збільшыня чысла учеників кашебского языка в школах.

В Малопольщы збільшыло ся чысло працуючых

Подля рапорту краківского Статистичного Уряду першыраз од вельох років чысло працуючых жытельок Малопольщы єст векше як тых, котры не сут професийональні активны. Одповідальны за тоту зміну сут головні жытелькы сел. В воєвідстві впал і реальный рівен безроботя – на початку минулого рока выносил він 4,1%, а в другій половині рока уж 2,8%. Найцікавшы в посліднім комунікаті сут даны тыкаючы затрудніня в малопольскых селах. Іщы під конец першой половины 2021 р. безроботя было там трираз векше як в містах, а індикатор затрудніня выносил лем 51%. В другій половині рока значучо збільшыло ся чысло працуючых, а індикатор затрудніня скочыл до 55% – в місті выносит він 58,5%. Безроботя на селі зменшыло ся праві двакратно і зближыло ся до 3%, што значыт, же єст близкє малопольскій середній.

Зимовы занятя для школярів в Маґурскым Нацийональным Парку

Маґурскій Нацийональный Парк простит школярів з опікунами на природничы вандрівкы, якы будут проходити наступны 4 тыжні кажду середу. Занятя одбудут ся в терені, каждый раз в інчым місци Парку. Першы пройдут в найблизшу середу, 19. січня/януара, в Розділю. Дрібниці про наступны прогулькы будут публикуваны каждый понедільок на вебсайті і фейсбуковым профіли Парку. Обовязуют записы.

Джерело фотоґрафіі: magurskipn.pl