Сумар дня на 17. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 17. жолтня/октобра 2024 р.

Поломництво до Талергофу

Припоминаме, што в уж в найблизшый вікенд, в днях 18.-19. жолтня/октобра одбуде ся общелемківскє поломництво до Талергофу, орґанізуване Талергофскым Комітетом. В проґрамі сут м.ін. Божественна Літургія в Фельдкірхен бай Ґрац, панахіда на місци спочынку жертв лаґру на цмонтері в Фельдкірхен, культурный проґрам і упамятніня жертв. Выізд єст плянуваный з участю грекокатолицкого і православного духовенства. Присутны будут делеґациі Стоваришыня Лемків і Стоваришыня «Руска Бурса» в Ґорлицях. Перше – общелемківскє поломництво до Талергофу – одбыло ся в 2004 р., орґанізатором было Стоваришыня Лемків. Товды тіж (здає ся першый раз) была одслужена православна панахіда, а тіж одкрыто пропамятну таблицю в ротунді на місцевым цмонтери. Того рока будут іщы дальшы Талергофскы Упамятніня, о котрых будеме іщы інформувати.

Нова катедра пармской єпархіі

В неділю 6. жолтня/октобра 2024 р. вірны і священникы грекокатолицкой пармской єпархіі разом зо своім владыком – Преосвященным Робертом Піптом, послідній раз стрітили ся на архієрейскій літургіі в Катедральным Соборі св. Йоана Крестителя в Пармі, в штаті Огайо, ЗША. Ден пізнійше были выданы два декреты підписаны пармскым єпархом. Першый рішыл, же дотеперішній парохіяльный Храм Св. Духа в Пармі стал новым собором з тым, же мінит свою назву на Катедральный собор Св. Йоана Крестителя. Другій інформує о тым, же старый катедральный собор был одсвяченый і може служыти на несакральны, но не нечысты (чыт. неморальны) цілі. Пармска єпархія належыт під Пітсбуржску Грекокатолицку Митрополию – русиньску церков sui iuris (свого права) в ЗША, і выникла в 1969 р. Того, же перенесіня собору не было легкым кроком, не крыє єпархія в офіцияльных документах. Пише ся в них веце о обставинах, котры сут з тым повязаны. Новый Катедралный Собор Св. Йоана Крестителя перейде зміны – єпархія хоче, жебы навязувал до русиньского походжыня свойой церкви.

Дві «Бесіды» о єдным часі

Часопис Стоваришыня Лемків – «Бесіда» святкує свій ювілей. В тых днях вышли вынятково два номеры часопису: дальшый – ч. 5 (200) за місяці вересен/жолтен 2024 р., та принагідный, ч. 200А. В реґулярным номері прочытаме м.ін. статі посвячены посліднім подіям в лемківскым народным жытю. Петро Трохановскій, шефредактор часопису, публикує споминовый текст з поломництва до Талергофу в 2004 р. Редакция часопису і Головный Заряд Стоваришыня Лемків склали желаня ведучому СЛ Андрийови Копчы з нагоды його ювілею 70. народин. З нагоды 200 номеру, редкация підготовила і принагідне выданя, котре припоминат нам тото, што мож окрислити як важне, цінне, цікаве. Більшіст з публикуваных дописів тыкат істориі і «жытя» Стоваришыня Лемків, найважнійшых моментів за остатніх 35 років.

Малопольскє воєвідство з Нагородм ПСК

Пряшівскы крайскы посланці вырішыли в понедільок призначыти Нагороды Пряшівского Самосправного Краю (ПСК) за 2024 рік трьом лавреатам і Малопольскому Воєвідству. Як раз для польского Малопольского Воєвідства была ціна призначена за долгочасове приятельство і партнерство з ПСК, выняткове заанґажуваня при розвитку черезграничной спілпрацы, гуманітарну поміч і інтенсивну підпору при будуваню просперіты обидвох приграничных територий. Святочне переданя Нагорід ПСК одбуде ся в грудни/децембрі в Театрі Йонаша Заборского в Пряшові.