Сумар дня на 18. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 18. грудня/децембра 2019 р.

Представлят поділ дотаций

Днес од 10.00 год. в просторах Міністерства Внутрішніх Справ і Адміністрациі проходит 69. засіданя Спільной Комісиі Уряду та Нацийональных і Етнічных Меншын. В порядку засіданя буде м.ін. бесіда про проблем меншын в діянях Рады Нацийональных Медий, діяня Інституту Нацийональной Памяти в квестиі нацийональной памяти в однесіню до меншын. Представникы міністерства представлят інформацию про дотациі на реалізацию в 2020 році задач, цілю котрых є охорона, захованя та розвиток культуровой достоменности меншын та захованя реґіонального языка. М.ін. дознаме ся, якы лемківскы орґанізациі отримали грошы на свою діяльніст і што в рамках фінансуваня будут реалізувати в будучым році. Підниманы будут на засіданю і квестиі звязаны з репрезентацийом меншын в парляменті і самоурядях, порівнюючы до інчых европейскых держав. Бесідувати будут про механізмы, фінансуваня і розміщыня в проґрамах передач для меншын в публичных медиях, представленый буде гармоноґрам робіт Комісиі на будучый рік.

В EтноЗагороді тіж і Лемкы

Явил ся новый сайт www.etnozagroda.pl. То етноґрафічна подорож по обшыри малопольского воєвідства. Сайт, котрый дозвалят познати ближе не лем етноґрафічны ґрупы, але і проявы етнічности некотрых з них. Єст придуманый в модерный спосіб. Проєкт має помочы зрозуміти культуровый феномен богатства і ріжности Малопольщы. Мария Бриляк-Залуска, етноґрафка і дослідничка народной культуры, спілавторка проєкту, пояснят, што великє заінтересуваня такой вшыткыма сферами традицийного сельского жытя спричынило, што выникла потреба представліня особливости малопольскых реґіонів. Описано м.ін Краковяків, Кліщаків, Лахів Щыжыцкых, Лимановскых, Сандецкых, Ґуралів Сандецкых, Погірян і очывидні Лемків. Мож почытати про язык, історию, будівництво, ґаздівство ци облечыня. Опис лемківской меншыны зрыхтувала М. Бриляк-Залуска. Сайт etnozagroda.pl то тіж путівник для глядаючых своіх коренів. Є можніст вписати хоц-яку місцевіст, котра находит ся на обшыри днешнього малопольского воєвідства. Специяльна глядачка дозвалят познати ентоґрафічне, а в припадку Лемків і етнічне походжыня.

Про воєнны цмонтері

Накладом коросняньского выдавництва RUTHENUS вказала ся дальша карпатска публикация. То книжка авторства Романа Фродимы пн. «Воєнны цмонтері з І світовой войны. Ґорлиці – Пільзно – Лужна». Публикация обнимат детальный опис 108 цмонтерів з трьох округів: Округ ІІІ Ґорлиці, ІV Лужна та Округ V Пільзно. Серед 55 цмонтерів з ґорлицкого округу сут описы цмонтерів, якы находят ся м.ін. в Ропици, Маластові, Вапенным, Фльоринці, Важицях, Рыхвалді, Розділю ци Мацині. Більшіст цмонтерів того округу запроєктувал Ганс Меєр, віденьскій інжынєр, іх стиль зве ся ґерманьскым. Переважают масивны памятникы в формі бетоновых або камінных крестів, памятниковы стіны ци пильоны. Огороджыня то часто полны муры з міцно зазначеном брамом. Кресты на нагробках зроблены были выключні з металю, зато дотырвали до днес переважні в добрій кондициі.

Ю. Дошна і М. Боґонь в Быдґощы

В Быдґощы вызвучат коляды співаны через вірных східнього обряду. «Дивная новина», «Небо і земля», «Ангел пастырям мовил» та інчы в характерный для ся спосіб запрезентує Юлия Дошна, а акомпанювал буде Мирослав Боґонь. Концерт пн. «Добый вечер Тобі, Пане Господарю» орґанізує Куявско-Поморскій Центр Культуры в Быдґощы. Презентация коляд і велийных обрядів пройде уж по святах, ци то празднуваных за новым, ци старым календарьом, бо 10. січня/януара 2020 рока.

«Христос ся раждає!»

На 20. грудня/децембра Піддукляньскій Умелецкій Народный Субор зрыхтувал проґрам під назвом «Христос ся раждає!». В першій части концерту запрезентуваны будут духовны і світскы коляды з ангелами, пастырями і королями, в духу народжыня Божой Дітины. В другій запрезенуют ся запрошены гості: Ленка Барілікова-Спишакова, акторка Театру Андрея Баґара в Нітрі, і Ян Ґаллович, актор драматичного колективу Словацкого Нацийонального Театру в Братиславі. Проґрам зачне ся о 18.30 год. на Великій Сцені Театру Йонаша Заборского в Пряшові.

Фот. Ева Міхна