Сумар дня на 18. липця/юлия 2022 р.

Приносиме вам сумар медияльной ґрупы ЛЕМ.фм+ на ден 18. липця/юлия 2022 р.

Што дале з реконструкцийом Музею Модерного Кумшту Енді Варголя?

Реконструкция Музею Модерного Кумшту Енді Варголя не єст уж така певна. Причыном єст нестарчаюча фінансова підпора од словацкого уряду. Рішыня в справі дотациі на перебудову музею власти дали іщы в 2019 р. Товды рішено передати 7,1 млн евро на тоту інциятиву. В рамках великой реконструкциі плянували м.ін. одновити фасаду і просторы обєкту, прибудувати і надбудувати будинок, так жебы міг помістити більше выстав і новых атракций. Єднак ціны з 2019 р. міцно ріжнят ся од тых, котры тепер повязаны з ремонтом музею, і фінансуваня в такій квоті не покрыє цілого кошту інвестициі. Як підкрислила пресова представничка Пряшівского Самосправного Краю, проєкт приниманый єст за важный і потрібный в реализациі. Не сут єднак в силі покрыти додатковых коштів, бо тепер реализация інвестициі вынесе близко 13 млн евро. В такій ситуациі Міністерство Фінансів запропонувало зрушыти постанову і зарекомендувало ПСК ждати на наступны можливы дофінансуваня. Додало тіж, же не было бы такого проблему, як бы реализация проєкту зачала ся в 2019 р.

В Ґорлицях плянуют пару змін на дорогах

13. липця/юлия одбыла ся стріча ґорлицкых самоурядовців з малопольскым воєводом і віцемаршалком воєвідства. Головном темом стрічы был проблем комунікациі в ґорлицкым реґіоні. В часі стрічы даны были 3 пропозициі, реализация якых повинна дакус зліпшыти рух в місті. Найважнійшом з них єст выбудувати турбінове рондо на Заводю на дорозі ДК28. О тым бесідували уж од даякого часу, а тепер подали вступну дату – до 2025 р. Додатково, важне єст выбудувати рондо в місци скрыжуваня з ул. Венґєрском, найправдоподібнійше обі інвестициі будут реализуваны єдночасно. Дальшы дві пропозициі то зміна локализациі пасів на ронді при друкарни і будова нового мосту на ріці Ропа, што буде мало великє значыня при почaтку перебудовы дорогы ДК28.

«Карпатскы Стрічы онляйн» з Оленом Дуць-Файфер

Карпатскє Товариство просит на дальшу стрічу з циклю «Карпатскых Стріч онляйн», тым разом посвячена буде Лемкам. Стрічу пн. «Лемкы днес – медже заником окремости а ревітализацийом культуры» вела буде др габ. Олена Дуць-Файфер. В своій прелекциі представит дві головны тенденциі в культурово-достоменностьовых процесацх: асиміляцийну, яка на два способы веде до занику ріжниц в однесіню до домінуючых культуровых взірців, і ревітализацийну, яка реализувана єст активныма концепцийныма лемківскыма середовисками. Стріча пройде в інтернетовій формі на плятформі ZOOM 28. липця/юлия о 19.00 год. Трансмісию з подіі мож буде обзерати на плятформі YouTube, а награня пак буде опубликуване на порталю karpaccy.pl.

Наступны вакацийны атракциі в Ґміні Команча

Ґмінный Осередок Культуры в Команчы просит на варштаты печыня хліба і еколоґічного выробу сырів. Подія направлена єст на діти, молодіж і дорослых з Команчы, Репеди і Щавного. Участ в варштатах єст дармова, але чысло місц єст ограничене. Записы приниманы сут в Осередках Культуры і Публичній Бібліотеці в Команчы. Варштаты одбудут ся в днях од 20. до 22. липця/юлия і реализуваны сут в рамках проєкту «Культурна Едукация в Команчы – з пасиі до натуры».

fot. Urząd Miejski w Gorlicach