Голосник

Сумар дня на 18. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 18. листопада/новембра 2020 р.


Робота над буджетом Польковиц

Власти Польковиц скінчыли робити над проєктом буджету ґміны Польковиці на 2021 рік. Тепер похылит ся над ним містецка рада. Оцінювати можут го тіж жытелі, бо документ є доступный на сайті polkowice.eu. Роботы над буджетом зачали ся іщы в половині рока. Своі внескы могли складати містецкы радникы, позаурядовы орґанізациі, спортовы клюбы, радникы з молодіжной рады ци рады сеньорів. Новістю было влучыня до робіт шолтыств в рамках близко мілийонового шолтысього буджету. Жытелі ґміны міцно ся активізували, як подає скарбник ґміны Катажына Ґрись. Во внесках нашли ся тзв. мягкы задачы, як орґанізация кєрмешів, варштатів, змагань, але і вельо задач тыкаючых інвестиций. В проєкті буджету нашли ся дальшы інфраструктуральны проєкты, особливі звязаны з перебудовами найвекшых комунікацийных пути міста і ґміны. Плянуют купити девят електричных автобусів, дальшы паркы будут ревітализуваны, будуваны будут роверовы стежкы ци туристичны пути. Продолжана буде політика творіня здравотных і соспільных проґрамів.

Книжка о Лемковині з нагородом

Книжці Мариі Стшелецкой пн. «Бескід без кіту» была признана Нагорода ім. Фердинанда Вспанялого за найліпшу книжку для діти 2019 рока. Орґанізатором конкурсу є Краків Місто Літературы Юнеско. В поясніню капітулы пише ся, што «Бескід без кіту» в непересічный спосіб дозвалят однести ся до скомпликуваной польской спадковины, а в тым примірі польско-лемківской спадковины. Книжка Мариі Стшелецкой то літературно-плястична істория о Лемковині, тій теперішній і тій сперед піл столітя, о єй таємницях, культурі, маґіі і природі. Капітула конкурсу звернула увагу і на ілюстрациі зроблены авторком книжкы, котры навязуют до бывшых часів, до реалистичной ілюстрациі, яка обовязувала в часах Польской Народной Республикы. Книжку печатало Выдавництво Лібра. Нагорода ім. Ф. Вспанялого для найліпшой книжкы для діти вручана є од 2016 рока. Єй цілю є промувати літературу і державных авторів і ілюстраторів.

Зас мож піти до русиньскоого театру

Театр ім. А. Духновича в Пряшові наново є отвореный для публикы. Білеты мож резервувати онляйн през сайт театру. Найблизшом пєсом, яку мож видіти уж днес навечер, є спектакль пн. «Зостали за дураків» авторства украіньского комедийоґрафа Марка Лукіча Кропивницкого. Комедия оповідат о двох сусідах, якы хотят найти мужів для своіх дівок. О тыжден, 25. листопада/новембра, буде мож видіти песу «Детектор лжы». То комедия од росийского драматурґа Василия Сіґарєва про супружество і супружескы проблемы, в котрій мож м.ін. видіти акторскій талант протаґоністів русиньского театру: Євґенія Лібезнюка, Людмилы Луканчіковой ци Осифа Пантликаша.

Кулінарный Пут Підкарпатскы Смакы

Представникы Стоваришыня для Розвитку і Промоциі Підкарпатя «Pro Carpathia» уважают, што ґастрономічный сектор вымагат постійной підпоры, што є особливі важне в часі запертя звязаного з пандемійом коронавіруса, бо бранжа боре ся, жебы перетырвати. Одтале, як пояснят Евеліна Нич з стоваришыня «Pro Carpathiа», взяла ся думка на промоцию обєктів на Кулінарным Пути Підкарпатскы Смакы. В рамках проєкту дофінансуваного самоурядом підкарпатского воєвідства печетали богато ілюструваный провідник по Кулінарным Пути, а тіж мапу воєвідства з нанесеныма обєктами і телеадресовыма даныма, під котрыма мож замовити стравы. Мапы будут роздаваны дармо в пунктах туристичной інформациі в цілым реґіоні, а провідникы во вшыткых обєктах, якы находят ся на Шляку.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі