Сумар дня на 18. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 18. лютого/фебруара 2021 р.

Критичне пізріня на лемкознавство

В найблизшый понедільок, 22. лютого/фебруара, одбуде ся важна лемкознавча конференция. Східньоевропейска Комісия Польской Академіі Знань просят на дискусию, яка пройде під назвом «Лемкознавство в ХХІ ст. – критичный реконесанс». Участ в конференциі возмут знаны науковці – Лемкы, але і Полякы, дослідникы лемківской тематикы в ріжных єй обшырях. Запрошены сут др габ. Олена Дуць-Файфер, основателька і долголітня ведуча лемківско-русиньской філолоґіі на Педаґоґічным Університеті в Кракові, др Богдан Горбаль, історик і робітник Нюйоркской Публичной Бібліотекы, др габ. Ева Міхна, адюнктка в Інституті Американістикы і Полонійных Студий Ягайлоньского Університету в Кракові, др габ. Анджей Зємба, історик Ягайлоньского Університету, і Даміян Новак, історик, якій занимат ся м.ін. історийом лемківскых церкви і сакрального будівництва. Стріча зачне ся о 17.00 год. Ціліст з причыны пандемічных ограничынь буде трансмітувана онляйн за посередництвом плятформы ZOOM – мотузок буде ся находил на сайті www.pau.krakow.pl.

Свидницкій аеропорт намагат ся на свій розвиток

Свидницкій аеропорт, котрый є актуально хоснуваный головно на спортове і рекреацийне літаня, буде партнером в медженародным проєкті вєдно з аеропортами в Ужгороді, Ніредьгазі і Сату Маре. Проєкт під назвом Carpathian Small Aviation был схваленый в рамках проґраму HUSKROUA (Hungary – Slovakia – Romania – Ukraine). Є то проєкт штырьох споминаных аеропортів во Свиднику, Ужгороді, Ніредьгазі і Сату Маре. Ціна проєкту є близко 148 тис. евро. Головным цільом є промоция туристичных, бізнесовых, освітніх і інвестицийных можливости окремых реґіонів, створити маркетінґовы активности, котры будут презентувати реґіоны в цілій Европейскій Уніі і во вшытых державах. Свидницкій аеропорт спілпрацує з Технічным Університетом в Кошыцях при тренуваню новых пілотів. В рамках проєкту будут одбывати ся тренуваня пілотів, презентация аеропорту і цілого реґіону, а вшытко тото принесе і фінансовый дохід для цілого міста.

10. річниця смерти Юрия Новосільского

Музей Ікон в Варшаві і Центр Сакральной Штукы ім. Новосільского, якій діє при православній парохіі в Кракові, запрашают на вечер памяти посвяченый Юрийови Новосільскому в десяту річницю його смерти. Стріча одбуде ся в найблизшу неділю, 21. лютого/фебруара, о 17.00 год. в просторах православной парохіі в Кракові. Буде ведена онляйн на фейсбуковым фанпейджы Музею Ікон в Варшаві. Вечер зачне ся молитвом за покійного Юрия Новосільского, по котрій буде концерт церковной музикы в выконаню мужского хору «Катапетасма». Пак буде выклад Віталия Міхальчука під наголовком «Іконостас – синтеза штукы в літургіі – православна традиция і творчіст Ю. Новосільского». Прелекция буде введніньом до більшой конференциі посвяченой артисті, яка зорґанізувана буде Музейом Ікон. Пройде она під назвом «Іконостас в православній літургіі і творчости Ю. Новосільского». Буде так само трансмітувана онляйн, в понедільок, 22. лютого/фебруара. Зо своіма прелекциями выступлят знавці творчости Новосільского і православной літургікы, о. Генрик Папроцкій, єпископ Михал Яноха, Кристина Черні, Ірина Татарова і Лукаш Гайдученя.

Выберте найкрасшу знимку нашого села

До днес до год. 23.59 мож голосувати в великым фіналі конкурсу о найкрасшу фотоґрафію русиньского села на Словациі. Конкурсовы знимкы презентуваны сут на офіцияльным фейсбуковым фанпейджы Округлого Стола Русинів Словациі. Голосувати мож в простый спосіб. Старчыт дати «ляйк» під знимком, котра вам ся найвеце любит. Тота знимка, котра до кінця днешнього дня буде мала найвеце голосів, стане найпопулярнійшом фотоґрафійом конкурсу і буде оцінена. Єднако оцінены будут і дальшы три фотоґрафіі, котры выбере жырі конкурсу і даст ім перше, другє і третє місце. Результаты конкурсу будут оголошены заран, 19. лютого/ фебруара, дополудня на фейсбуковым фанпейджы ОСРС. Знимкы прислало парунадцетьох авторів.