Сумар дня на 18. мая 2026 р.

Приносиме вам сумар медияльной ґрупы ЛЕМ.фм+ на ден 18. мая 2026 р.

40. засіданя Округлого Стола Русинів Словациі

В пятницю 15. мая в Пряшові одбыло ся 40. засіданя Округлого Стола Русинів Словациі (ОСРС). В ювілейным засіданю ОСРС брал участ і полномічный влады СР про нацийональны меншыны Акош Горонь. Медже присутныма был і Ян Коцак, русиньскій амбасадор, котрый є одповідальнй за кооперацию при підпорі і розвитку русиньской соспільности Пряшівского Самосправного Краю. Коцак інформувал о конкретных кроках ПСК про зліпшіня якости жывота жытелів та о підпорі культурных подій, в селах і містах, де жыют Русины. ОСРС на своім засіданю дискутувало дакілько актуалных тем. Бесідувано м.ін. о рыхтуваній новелизациі закону о сельскым і містным зряджыню. Округлый Стіл Русинів Словациі апелює до власти Словацкой Республкы і Нацийональной Рады Словацкой Республикы, жебы при рыхтуваню новелизациі і реформі самосправы забезпечыли захованя істнуючых прав нацийональных меншын, та жадат активной участи представників меншын в рыхтуваню реформ. Веце дрібниц дознате ся з допису на нашым портали.

В Любіні одбуде ся чергова едиция подіі «Лемкы в Центрі»

Музей Істориі Польщы черговый раз признал дофінансуваня, в рамках дотацийного проґраму «Патріотизм Будучности» («Patriotyzm Jutra»). Проґрам підпорює фундациі, стоваришыня, бібліотекы, домы культуры і реґіональны музеі з цілой Полщы, што занимают ся плеканьом і промуваньом локальной дідовизны, істориі і культуры. В його рамках мож было внескувати о дофінансуваня в высокости 10-80 тис. злотых. Цілый буджет то 4,5 млн злотых. Зголошено 797 проєктів з цілой Польщы. Дофінансуваня отримали 94 проєкты. На переді списку, на семым місци, нашол ся проєкт зголошеный Центром Творчых Діянь в Любіні з назвом «Лемкы в Центрі 2026 – Традиция і сучасніст. Культурна дідовизна лемківской соспільности на Нижнім Шлеску». На проєкт признано 75 тис. злотых дофінансуваня. Чергова, третя едиция подіі «Лемкы в Центрі» одбуде ся осіню, в жолтни/октобрі і листопаді/новембрі. В плянах сут концерты, варштаты, ай прелекциі. Подія рыхтувана єст Центром Творчых Діянь во спілпрацы з представниками лемківской соспільности, але направлене єст на вшыткых жытелів повіту. Як заявлят о. Богдан Репела, парох православной парохіі св. Тройці в Любіні, в рамках тогорічной едициі подіі одбудут ся концерты церковной музикы, як і народной лемківской музикы. Будут тіж проведены варштаты писаня ікон. О детальным проґрамі орґанізаторы поінформуют в дальшым часі.

В Злоцкым будуют курортну променаду

В курорті на Лемковині – Злоцкым росне атракция, котра має створити новый центр жытя для жытелів, курортників і туристів. То курортна променада, долгости близко 1,6 км. Має она получыти функциі дептака, біциґльовой стежкы і зеленой выпочынковой зоны. Ціліст має заховати камеральный характер, але єдночасно стати ся репрезентацийном частю курорту. Вздолж променады будут стояли лавкы, перґолі, лежакы і специяльны зоны одпочынку. Будут тіж роверовы стоякы, новы паркінґовы місця і пункт побераня мінеральной воды. Проєкт передвидує тіж створіня міні-парків. Ґміна Мушына отримала на тоту інвестицию 8 млн злотых з Европейского Фонду Реґіонального Розвитку. Цілковитый кошт задачы то понад 9 млн злотых. Будова уж тырват. Завершыня прац заплянувано на серпен/авґуст 2027 р.