Приносиме Вам сумар медияльной ґрупы ЛЕМ.фм на ден 18. вересня/септембра 2019 р.
О Лемках будут розправляти в Сан Франціско
Кінцьом листопада/новембра в Сан Франціско в ЗША пройде конвенция Стоваришыня над Досліджаньом Славян, Східньой Европы і Евразиі. Конвецния орґанізувана є каждого рока осіню в інчым місті Пілнічной Америкы. Цілю того медженародного форум є шырока выміна інформаций, думок та стимуляция дальшой науковой роботы славістів з цілого світа. На запрошыня Carpatho-Rusyn Research, єдном з прелеґенток конвенциі буде Марта Ватраль, докторантка з Ягайлоньского Університету, дослідничка лемківской літературы. Єй участ заплянувано вчас панелю пн. «Карпатска Русь в часах комунізму: достоменніст, ідеолоґія та література». Справы Русинів омавляны будут тіж в другым панели, його тема то: «Документуваня жытя Карпатскых Русинів і іх сусідів на Підкарпатскій Руси і поза». Ведучом той части буде Мария Сільвестрі з John and Helen Timo Foundation. 51. Конвенция Стоваришыня над Досліджаньом Славян, Східньой Европы і Евразиі проходила буде од 23. до 26. листопада/новембра, а єй проґрам обнимат парудесят панелів і соткы выступлінь дослідників з університетів цілого світа.
Русиньскій Театр за меджом
Русиньскій Коморный Театр того місяця іщы двараз вкаже пєсу «Наша звада – наш хліб», 21. і 29. вересня/септембра одбудут ся показы в Збойным і Габурі. Показы проходити будут в рамках діяльности Русиньского Коморного Театру, котрый є соспільным здружыньом зосереджаючым професийных театральных творців, акторів, музиків, літератів, якых лучыт русиньска нацийональніст. Ядро того артистичного ансамблю сформувало ся на зламі 2015 та 2016 років. Два рокы тому окрем презентациі выдатных представителі артистичного і соспільного жытя Русинів, театр зачал творити репертуар, основом якого єст творчіст русиньскых авторів. Здружыня занимат ся тіж выдаваньом публикаций ци орґанізуваньом музичных выступів – найблизшы такы пройдут 24. і 29. вересня/септембра в Снині і Чабалівцях – з блюсовым концертом выступит гын Владислав Сивый. Про жолтньовы/октобровы подіі будеме іщы інформувати.
Біциґлями слідом проф. Райнфуса
8. Етноґрафічный Біциґльовый Райд Слідами проф. Романа Райнфуса выстартує в неділю, 22. вересня/септембра. До выбору сут 3 трасы зо зріжницюваном долгістю і трудністю, кажда кінчыт ся на обшыри Скансену Погіряньского Села в Шымбарку. Найдолша, 55-кілометрова веде од Ґорлиц через Рыхвалд, Маґуру, Білянку, Лося до Шымбарку, коротша чыслит 30 км, а найкоротша, котру мож перейти і піше – 10 км. По активній части в проґрамі подіі од 16.30 є заплянуваный пікнік з прелекцийом Кристины Райнфус-Януш, дівкы професора. В дальшій части заплянувано концерт народной музикы, едукацийны варштаты, конкурсы, а тіж буде мож попрібувати стравы реґіональной кухні. Жебы брати участ в райді, треба ся скорше записати, термін заран до кінця дня. Деталі найдете на сайті muzeum.gorlice.pl.
Свято Мазяра скарбом Малопольщы?
11. вересня/септембра зачал ся другій етап голосуваня в конкурсі Малопольского Воєвідства пн. «Туристичны скарбы Малопольщы». О мено найліпшых оферт і туристичных продуктів старат ся парудесят обєктів і подій. Голосувати мож в пару катеґориях: місце з климатом (голосує ся на місцевіст або ґміну), найбарже інтересуючый туристичный пут, циклична подія, унікатова туристична атракция, аґроґаздівка та ґастрономічный обєкт. Серед номінуваных находят ся м.ін. ґміна Крениця, Явіркы, Пут Деревяной Архітектуры в Малопольщы, Фестіаль Музика Заклята в Дереві, Свято Мазяря орґанізуване Мазярском Загородом в Лоси. Выграны возмут участ в промоцийній кампаніі Малопольской Туристичной Орґанізациі, а лавреат в катеґориі «Місце з климатом» отримат нагороду Маршалка Малопольского Воєвідства высокости 50 000 зл. Інтернетове голосуваня тырват до 29. вересня/септембра на сайті konkurs.visitmalopolska.pl.
Коментарі