Сумар дня на 18. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 18. жолтня/октобра 2023 р.

Громадяне Польщы выбрали

15. жолтня/октобра проходили в Польщы парляментарны выборы до Сойму і Сенату. Громадяне Польщы оддали найвеце голосів – 35,38% на партию Право і Справедливіст, зараз за ньом є Громадяньска Коаліция, котра здобыла 30,70% голосів. Коаліцийный Выборчый Комітет Третя Дорога здобыл 14,40% голосів, Нова Лівиця 8,61% і послідня, котрой кандидаты войдут до парляменту – Конфедерация Свобода і Незалежніст – здобыла 7,16% голосів. Фреквенция вынесла 74,38%. Двом кандидатам, што стартували з лист Выборчого Комітету Третя Дорога Польща 2050 Шымона Головні – Польскє Народне Сторонництво, Янови Войтовичови і Богданови Ґочови, якы одкрыто деклярували задбаня о лемківскы інтересы в припаді достаня ся до Сойму, на жаль, не повело ся здобыти посольскых мандатів. Ян Войтович, котрый стартувал з Округу но 1 здобыл 8117 голосів, зас Богдан Ґоч, якій стартувал з выборчого Округу но 22 здобыл 485 голосів, найвеце – 266 в коросняньскым повіті. Ян Войтович найвеце голосів здобыл в польковицкым повіті.

Німецка Меншына першый раз од 1991 рока без репрезентанта в Соймі

Остаючы іщы при темі выборів – Выборчый Комітет Выборців Німецка Меншына не здобыл одповіньой кількости голосів і першый раз од 1991 рока в Соймі забракне єдиного меншынового посла – репрезентанта німецкой меншыны. Округом, з котрого од років до Сойму доставали ся передставникы німецкой меншыны є Округ но 21, што обнимат цілый обшыр опольского воєвідства. Подля результатів Повселюдного Спису з 2021 рока жыє гын 132,5 тис. осіб, што декляруют німецку нацийональніст. То єдиный округ, в котрым стартує ВКВ Німецка Меншына. По підрахуваню голосів в тым округу, вказало ся, што ВКВ Німецка Меншына здобыла там 5,37% голосів і нашла ся на шестым місци, што по перерахуваню розкладу голосів методом д’Ондта не дає можливости здобити посольскій мандат. Тым самым першы раз од 1991 рока бракне в Соймі передставника німецкой меншыны.

Розправляли про охорону і заряджаня деревяном архітектуром

В минулым тыжни в Кракові прошла Медженародна наукова конференция «Напрямы охороны і зрівноваженого заряджаня спадковином деревяной архітектуры. 20 років впису Деревяных костелів полудньовой Малопольщы та 10 років впису Деревяных церкви в польскым і украіньскым реґіоні Карпат на Листу Світовой Спадковины ЮНЕСКО». Конференция проходила в днях од 12. до 14. жолтня/октобра, а зачала ся од вручыня медалю «Заслуженый Культурі Gloria Artis» Казімєжови Чепєльови. То краківскій історик штукы, технік артистичного столярства, специялиста в обшыри реновациі памятниковых меблів і орґанів. В рамках конференциі были м.ін. два панелі: Сучасны вызваня в охороні спадковины: зміны климату і збройны конфлікты та Заряджаня спадковином деревяного будівництва – роля соспільной свідомости і добрых практик. З рефератами выступили м.ін. Катажына Тур-Марцішук та Анджей Жыґадло. В рамках конференциі на пляци Щепаньскым в Кракові одкрыли выставу «Скарбы деревяной сакральной архітектуры. Костелы і церкви на Листі Світовой Спадковины ЮНЕСКО». Выставу мож гын обзерати до 6. листопада/новембра тр.

Школіня з обшыри медичного ратівництва і спортового стрільництва

Уж заран в Польковицях пройдут безплатны школіня з обшыри медичного ратівництва і спортового стрільництва. Проєкт школінь зрыхтували Фундация PHCF та Фундация KGHM. Школіня вести будут інструкторы з досвідчыньом в мундуровых службах. Жебы взяти в них участ, треба мати польскє громадянство і скінченых 13 років. Школіня будут тырвати коло шестьох годин і будут закінчены інтерактивным тестом.

Фот. Фб Яна Войтовича