Голосник

Сумар дня на 19. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 19. листопада/новембра 2020 р.


Вмер Янко Карафа, знаный з касеты «Світ місячку»

Як поінформувала мужска співоча ґрупа Шамбрінці, в віторок рано, 17. листопада/новемвра, по наглій і короткій хвороті вмер єден з народных співаків, інтерпретатор русиньскых співанок, Янко Карафа. Як ся споминат на сайті Шамбрінців, был він предовшыткым знаный з того, што выступувал в дуеті зо Штефаном Лукацком, але так само співал парураз з Шамбрінцями. Ґрупа пращат свого камарата, і просит, жебы добрый Господ принял го до свого царства небесного. Янко Карафа як раз зо Штефаном Лукацком награли культову касету «Світ місячку», на котрій выконали пару русиньскых співанок. Альбом был записаный такой перед 30 роками.


Ціна Памяти Народа про жену, яка ратувала русиньскы діти

В віторок, 17. листопада/новембра, в Ден Борбы за Свободу і Демокрацию, уж традицийно передавали Ціны Памяти Народа. Тото оцініня передає безпрофітова орґанізация Post Bellum, котра діє в Чехах і на Словациі. Посмертно достала Ціну Памяти Народа Квєтослава Бартоньова, котра помогла бідным русиньскым дітям з Долины Смерти. Бартоньова (рр. 1928-2017) як студентка Учытельской Семінариі в рідным Оломовци вєдно зо єдноклясницьом Вєром Крістовом пішли в літі 1946 р. до знищеных русиньскых сел на східній Словациі в тзв. Долині Смерти. На місця, де проходили єдны з найтяжшых боів ІІ світовой войны. Молоды студенткы там привезли збірку одежды про містны діти. Ішли конкретно до сел Вышня і Нижня Писана. Кєд же діти єй просили о поміч, по тым, што ся вернула до Оломовця, зачала під покровительством Чехословацкого Общества орґанізувати іх скорый прихід до ій рідного міста. Мусіла ім выбавити кватерунок, доктора, школу ци фінансы. Вдяка ній 45 діти пришло на єден шкільный рік до Оломовця. О 13 дівок постарали ся католицкы монашкы, 32 діти взяли ґу собі родины, котры одповіли на вызву Чехословацкого Общества. Дакотры діти, котры были сиротами, были уж адоптуваны в Оломовці, чым ім забезпечыла ліпше дітинство і жывот.


Руска Бурса фурт жде на участників конкурсу

Припоминаме, же Стоваришыня «Руска Бурса» в Ґорлицях просит до участи в плястичным і літературным конкурсі. До выграня барз атракцийны нагороды. Того рока проходит сотна річниця народжыня лемківской поетесы Меляніі Собин. З той нагоды просиме охочы діти (до 9 рока жытя) намалювати образок (свобідном техніком), котрый буде інтерпретацийом выбраного верша Собин. Для старшых учеників пропонуєме конкурс, в котрым можут выказати ся креативністю в писаню. Задачом є написати твір на тему «Скарб мойой бабы/ мого діда», в котрым опишут тото, што є цінным для іх прародичів, чому не дадут пропасти, што хотят сохранити. Творы оцінюваны будут в двох катеґориях: школярів в віку 10-12 років та 13-15 років. Найліпшы творы будут опубликуваны на сайті лем.фм, де найдете тіж деталі і реґулямін конкурсу. Конкурсовы праци можете высылати до 30. листопада/новембра.


Біциґльовы трасы в Полонинах з новыма означынями

Біциґльовы трасы в Полонинах на Словациі отримают в тых днях нове означыня. Орґанізация Aevis так хоче зліпшыти істнуючу інфраструктуру про тых, котры ходят до реґіону на біциґльову туристику. Обновліня крисленого означыня і дополнюваня туристичного прямуваня реализує ся на вшыткых трасах з окресу Снина до окресу Меджелабірці. То значыт од Біциґльоходника уменя, котрый лучыт Сниньскій каштель з Музейом модерного уменя Енді Варголя в Меджелабірцях. Іде о десят трас о долгости 263 кілометрів. Тот словацкій реґіон єст єдным з атракцийнійшых і красшых місц в Карпатах, де мож як раз прібувати локальну туристику.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі