Сумар дня на 19. мая 2021 р.

Приносиме вам сумар медияльной ґрупы ЛЕМ.фм+ на ден 19. мая 2021 р.

Архієпархіяльный одпуст в селі Грабскє

В минулу неділю, 16. мая, в русиньскым селі Грабскє одбыл ся архієпархіяльный одпуст в памят блаженного священномученика Василя Гопка, пряшівского помічного єпископа. Торжество проходило в згоді з актуальныма пандемічныма ограничынями. Головным служытельом был протосинкель Пряшівской Архієпархіі Любомир Петрик, котрый выголосил на одпусті і казаня. Блаженный Василь был родаком зо села Грабскє. За блаженного был выголошеный в 2003 році Папом Йоаном Павлом ІІ в Братиславі. В літургічным календари має свято 11. мая. В Грабскым ся на його памят орґанізує каждорічно архієпархіяльный одпуст. Село сусідує зо Санковом ци Куровом, а по лемківскій страні – з Войковом, Мушынком і Тыличом.

Ґорлиці зас доцінены

В тогорічным ранкінґу Денника Правной Ґазеты «Перлины Самоуряду 2021» місто Ґорлиці здобыло выріжніня в катеґориі Лідер Комунікациі і Промоциі в обшыри соспільной комунікациі. Капітула конкурсу доцінила схоснуваня постати Ігнатия Лукасєвича в соспільній кампаніі «Буд як Ігнатий». Речена кампанія має на ціли популяризацию знаня про Лукасєвича і навязує до промоцийной маркы «Ґорлиці – Місто Світла», базуючой на засобах і спадковині ґорлицкой землі, як ядра світовой нафтовой індустриі. Схоснуваня візерунку Лукасєвича, фармацевты, підприємці, піонєра нафтовой індустриі в світі, як взірця до наслідуваня, особы, котра выкликує довіря, пошану, сприяло м.ін. промуваню постав тыкаючых безпекы в часі тырваня пандеміі.

Цикльострада альтернативом для автомобільного транспорту

Iщы до 10. червця/юнія мож зголошувати увагы до проєкту Нижньошлезской Цикльострады. Є то проєкт обнимаючый веце як 1800 км трас, котры мают поправити транспортову доступніст реґіону, зінтеґрувати місцевы роверовы дорогы і повязати з нижньошлезском желізницьом. Проєкт Цикльострады опертый є о сіт головных біциґльовых трас, якы обнимают цілый реґіон, лучат ся тіж з роверовыма трасами по чешскій і німецкій странах. Проєкт твореный є на основі обєктивных критерий і забезпечат м.ін. обслугу туристичных атракций, получыня з найважнійшыма осередками реґіону і єст зінтеґруваный з ґруповом комунікацийом. Нижньошлезскє воєвідство хоче зреализувати проєкт протягом найблизшых 3-4 років во спілпрацы з нижньошлезскыма ґмінами. Цикльострада обнимала буде туристичны, але і долгодистансовы трасы, якы іти будут тіж через сусідні воєвідства. Увагы до трас можна высылати через Нижньошлезскій Ґеопорталь під адресом: geoportal.dolnyslask.pl.

Проєткы близкы жытелям

Од 14. мая вшыткы жытелі малопольского воєвідства, якы скінчыли 16 років, можут заголосувати на проєкты в рамках 5. едициі Громадяньского Буджету Малопольского Воєвідства. Того рока принято до голосуваня рекордове чысло задач, бо аж 234. Голосуваня тырват до 14. червця/юнія, а результаты оголошены будут до 22. жолтня/октобра. Орґанізаторы рекомендуют, жебы голосувати на выбрану задачу предовшыткым інтернетово, мож тіж кореспонденцийні або через вшмаріня карты в вызначеным місци. Громадяньскій Буджет дозвалят жытелям воєвідства рішати, на што выдати част грошы, якыма диспонує маршалківскій уряд, а што веце – сут то проєкты, котры выдумали і опрацували самы жытелі того реґіону.