Голосник

Сумар дня на 19. жолтня/октобра 2020 р.

Приносиме вам сумар медияльной ґрупы ЛЕМ.фм+ на ден 19. жолтня/октобра 2020 р.


В Польщы новы рестрикциі

Од суботы, 17. жолтня/октобра, в цілій Польщы обовязуют новы рестрикциі. Подля новых інформаций червеном зоном обняты сут 152 повіты і міста на правах повіту. В нижньошлезскым воєвідстві сут то м.ін. повіты: ґлоґівскій, ліґницкій, любіньскій ци польковицкій. В Малопольщы в червеній зоні находят ся м.ін. повіты: ґорлицкій, краківскій, лимановскій, новосандецкій ци новотарскій, а тіж Краків, Тарнів і Новый Санч. Вшыткы повіты, якы не были зачыслены до червеной зоны, автоматично остают в жолтій зоні. Подля розпоряджыня в жолтій зоні в высшых і понадосновных школах обовязує гыбридове вчыня; в червеній зоні на дистанс. В цілій державі обовязує заказ діяльности дискотек, клюбів і обєктів з місцьом до гуляня (окрем спортовых танцювальных клюбів і шкіл). Так само в цілій Польщы сут закрыты басены, водны паркы, центры фітнес і спорту. В обох зонах рестрикциями сут обняты і ґастрономічны локалі, якы можут быти одкрыты лем в годинах од 6.00 до 21.00. Занятый може быти лем што другій столик. Спортовы подіі мают проходити лем без участи публикы. Кєд іде о транспорт – лем половина місц до сіджыня або 30% вшыткых місц може быти занята. Публичны згромаджыня сут ограничены до 25 осіб в жолтій зоні і до 10 в червеній. В реліґійных подіях може брати участ не веце як єдна особа на 4 квадратны метры обєкту в жолтій зоні, і не веце як єдна особа на 7 в червеній зоні. Обовязує 1,5-метровый одступ медже вірныма, якы мусят закрывати ніс і ґамбу. Обовязуют і ограничыня гандлю – 5 осіб на касу в меншых склепах, або 1 особа на 15 квадратных метрів в великых. Од днес змінены сут і принципы тыкаючы орґанізациі імпрез, нп. весіля. В жолтій зоні може в них взяти участ максимяльно 20 осіб, без можливости гуляня. В червеній зоні обовязує заказ орґанізациі такых подій.

FUEN в Европейскым Парляменті

В четвер, 15. жолтня/октобра, в Европейскым Парляменті в Бруксели прошло публичне переслуханя Ініциятивы Minority SafePack, якє принесло барз добрый результат. Запрезентувано рекомендациі Ініциятивы Minority SafePack, якы тыкают того, як законы Европейской Уніі могли бы промувати права меншын, як тіж языкову і культурову ріжнорідніст в Европі. Выступліня закінчыло ся великым успіхом. Тепер FUEN (Федеральна Унія Европейскых Нацийональных Меншын) може ся тішыти підпором не лем мілийона европейскых громадян, але і вельох членів европейского парляменту, як тіж европейскых інституций.

 Бобслейово-санко-скелетоновый тор в Креници

Власти Крениці выбрали нове місце на будову першого в Польщы бобслейово-санко-скелетонового тору. Нова атракция мала бы быти побудувана на горі Івонка, під котром тепер находят ся ледовиско і спортове боіско. Тор мал бы сполняти вшыткы вымогы, кєд іде о долгіст і гомолоґациі FIS (Медженародной Федерациі Лыжного Спорту) до орґанізациі вшелеякых загальносвітовых і европейскых подій. Выбрана обшыр в більшости належыт до ґміны. З властителями решты ділянок ведены сут бесіды. В будучым році має быти оголошеный конкурс оферт на зробліня проєкту обєкту. Інвестиция має быти сфінансувана Міністерством Спорту. Кошт інвестициі то ок. 100 млн зл.

Фотоґрафічный Конкурс Польковицкого Повіту перенесеный

Змінил ся кінцьовый термін присыланя прац на Фотоґрафічный Конкурс Польковицкого Повіту пн. «Неодкрыты цінности польковицкого повіту». Фотоґрафіі мож высылати іщы до 30. жолтня/октобра тр. Цілю конкурсу є вказати на фотоґрафіях незнаны дотля природничы, історичны, культуровы і характеристичны для повіту місця. В конкурсі мож выграти грошову нагороду, як тіж публикацию фотоґрафій в специяльні печатаным альбомі.

Шеруй.

О авторі

Ленка Стефановска

Коментарі