Сумар дня на 2. червця/юнія 2022 р.

Приносиме вам сумар медияльной ґрупы ЛЕМ.фм+ на ден 2. червця/юнія 2022 р.

Одозва до Ясюнчан

В остатнім номері «Бесіды», а тепер на нашым портали lem.fm, запознати можете ся з одозвом Михала Гайтко до Ясюнчан, значыт до вшыткых, якых коріня выходят з того лемківского села, якє находит ся медже Кривом а Чорным (пару кільометрів од Ґладышова). Автор одозвы, Михал Гайтко, на даный момент кінчыт писати книжку о істориі Ясюнкы і роду Гайтко, але радо прийме кажду інформацию ци то фотоґрафію, котра могла бы ся найти в книжці. Потрібне єст лем Ваше заанґажуваня, родженых в рідній Ясюнці, або потомных, што в своіх родинных архівах быти може переховуют цінны інформациі. Михалови Гайтко повело ся по прешло 30 роках одзсыскати рідну землю, на котрій хоче поставити пропамятный крест, під котрым на таблици выписаны были бы вшыткы ясюнчаньскы роды до 1947 р. І ту потрібна єст поміч – найбільше фінансова, бо декотры річы вымагают фінансового накладу. Кєд сут охочы, просит ся о контакт під майльом: michalhajtko@wp.pl. Окдрытя памятника – кєд добрі піде – заплянуване єст меньше-більше о рік.

42. Лемківска Ватра на Чужыні

Червец/юній то місяц, коли помалы думаме о лемківскых вакацийных подіях і імпрезах. І так уж тепер треба нам припомнути, што 42. Лемківска Ватра на Чужыні в Михалові одбуде ся традицийно в першый вікенд серпня, значыт в днях 5.-6. серпня/авґуста. Попередні дві едициі Ватры з причыны пандеміі тырвали лем єден ден, но тепер подія одбуде ся по старому – в пятницю і суботу. В проґрамі тогорічной михалівской Ватры будут м.ін. выступы ансамблів, якы придут з Пряшівской Руси. Кєд ся поведе – быти може загостит – хоц бы віртуально – ансамбль з Підкарпатской Руси. Тогорічна Ватра буде проходила на фоні умапямтнінь 75. річниці Акциі Вісла, прото і тота част найде належне місце в проґрамі Ватры. Сам проґрам буде дакус одсвіженый – але то покля што несподіванка.

Новы інвестициі на Лемковині

В рамках другой едициі Урядового Фонду Польскій Лад: Проґрам Стратеґічных Інвестиций до ґорлицкого реґіону трафлят новы дофінансуваня. На розбудову жде повітова дорога Ропа-Высова-Бліхнарка-границя державы в Высовій з розобраньом старого мосту і будовом нового вєдно з доіздами. Ґорлиці хочут провести другій етап ремонту одркытого басену ци выремонтувати дорогы і уличкы в самым центрі міста. В сусіднім підкарпатскым воєвідстві розбудуют м.ін. основну школу в Крампній, зроблят ходник од Крампной до Котани, выремонтуют дорогу і ходникы в Івоничы, Рыманові, Дукли, розбудуют дорогу Мысцова-Поляны на потребы плянуваной будовы водного резервуару. В Репеди же добудуют ґімнастичну салю, предшколя, боіско, пляц забав і паркінґ. В Команчы перебудуют будинок желізничной стациі.

В Чырчу посвятили новый престіл і інтерєр церкви

26. мая на праздник Вознесенія Господа в приграничным до Лемковины селі Чырч были церковны подіі. В місцевій грекокатолицкій парохіі одбыло ся посвячыня нового престола і одновленого інтерєру храму Покровы Пресвятой Богородиці. Церков посвятил владыка Петро Руснак, апостольскій амдміністратор пряшівской архієпархіі. На кінци торжества владыка оцінил медальом блаженого єромученика Павла Петра Ґойдича церковника і дзвонаря Юрия Шіму і канторку Катерину Черкальову за долгорічну жертвенну службу парохіі і церкви.