Сумар дня на 2. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 2. лютого/фебруара 2022 р.

Креницкій Opera House

Неодолга під Парковом Гором в Креници зачне ся будова важной для розвитку курорту інвестициі. Афмітеатр в Креници побудуют при ул. Никыфора Креницкого, близко нижньой стациі колейкы на Паркову Гору. Має мати задашену сцену з простором 100 квадратных метрів і тисяч сідячых місц для публикы. Проєкт навязує до Opera House в Сидней, а задашена част – до креницкых віллі при Бульварах Дітля. Середкы на побудуваня аміфтеатру, близко 10 млн зл, походят з проґраму Польскій Лад. На тот момент власти ждут на консерваторскє рішыня і позволіня на будову. В заміріню буде то постійне місце, де будут орґанізувати вшыткы культурны подіі в терміні од мая до жолтня/октобра, без конечности возношыня розбераной сцены на головным тротуарі при пияльни. Сцену амфітеатру схоснуют тіж до декоруваня спортовців в часі ІІІ Европейской Олимпіяды в 2023 році. При сцені находити ся будут іщы тоалеты і ґардеробы.

 Пляны Шаришского Щавника

Русиньскє село Шаришскій Щавник в окресі Свідник хоче піти в сліды інчого русиньского села – Чырч, і урухомити в себе сельскій бізнес, значыт выробну фірму, котра буде мала статус соспільного бізнесу. Як подал шолтыс села Михал Кімак, фірма буде ся занимала м.ін. ведіньом склепу і продукцийом выробів до ідла. Іде предовшыткым о розвиток села і творіня новых місц роботы, жебы притягнути молодых люди, в звязку з тым, што чысло жытелів Шаришского Щавника з рока на рік падат. В дальшых плянах шолтыса взглядом села є зревітализувати публичны зовнішні просторы.

Ґміна Польковиці была номінувана в конкурсі Здоровый Самоуряд

Як подал Самоурядовый Порталь – Ґміна Польковиці была номінувана в конкурсі Здоровый Самоуряд за проґрам профіляктичных вакцин проти пневмококам для жытелів ґміны выже 60. рока жытя. В минулым році в ґміні Польковиці дармо приняло вакцину аж 95,6% популяциі кваліфікуючой ся до проґраму, а цілю было осягнути ступін 70% вакцинуваных. Конкурс Здоровый Самоуряд орґанізуваный єст пятый раз Самоурядовым Портальом та часописом Рынок Здоровля. До редакциі вплынуло веце як 90 зголошынь здравотных проґрамів ґмін, повітів і воєвідств, з чого выбрали 30 номінаций. Лавреатів выбере Консультацийна Рада, а нагороды будут признаны в катеґориях Здорова Ґміна/Місто, Здоровый Повіт та Здорове Воєвідство. Серед номінуваных є тіж м.ін. любушскє воєвідство за кампанію промуючу вакцины проти COVID-19.

В горах небезпечні

В высокых горах фурт утримуют ся екстремальны условія до заниманя ся туристиком, хоц загороза зсуніня ся великой масы снігу в Татрах зменшыла ся з третьой ступени на другу. В тых днях предвидуване є дальше інтенсивне куріня снігу. Дуючый вітер утворил барз глубокы заметы, маючы по пару метрів. Порушаня ся в такых условіях вымагат барз великого досвідчыня в зимовій гірскій туристиці, знаємости оціны місцевой загорозы зсуніня ся снігу та одповіднього ґратя, такого як ракы, чекан, каск і інче. На ниже находячых ся гірскых путях явила ся нова верства снігу, місцями єст єднак барз слизко, зато плянуючы прогулькы в горы, треба мати антислизґовы рачкы і кыйкы, подают робітникы Татряньского Нацийонального Парку.