Сумар дня на 2. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 2. серпня/авґуста 2022 р.

Лемкы зышли ся в Зындранові

В минулый вікенд в Зындранові проходило свято «Од Русаль до Яна», якє од тридцетьох років (з невеликыма перервами) орґанізує Музей Лемківской Культуры. Першый ден свята одбывал ся в суботу. Концерты початково проходили на розложеній сцені при зындранівскым культурным домі, лем пришла буря і дальша част мусіла одбывати ся в середині. Недільна част з огляду на погоду проходила уж выключно в просторах культурного дому. В суботу были положежы квітя під памятниками мартиролоґіі лемківской нациі. В подіі участ брали окрем самоурядовых власти, м.ін. др Мирослава Копыстяньска, членкыня СКУтНіЕМ та Севериян Косовскій, секретар ГЗ СЛ і редактор нашого радия.

Ропа, Устя Рускє найбіднійшы. На челі Польковиці, Рудна

Mіністерство Фінансів опубликувало показникы податковых доходів перерахуваных на єдного жытеля. На іх основі мож вказати найбогатшы і найбіднійшы самоуряды в Польщы. Середній податковый дохід в перерахуваню на жытеля для цілой державы то 2122 зл. Ниже той середньой нашли ся вшыткы ґміны ґорлицкого повіту. Вісем з них не осягнуло ани половины державной середньой. Примірно, середній податковый дохід ґміны Устя Рускє то 1012,35 зл, а ґміны Ропа – 694,83 зл. Серед ґмін о найвысшым показнику найдеме Польковиці і Рудну на Нижнім Шлеску, для котрых показникы вынесли за шором 6585,53 зл і 5236,62 зл. В першій пятдесятці єст іщы ґміна Любін з сумом 3998,11 зл.

Поведе ся выремонтувати пару церкви

Міністер Культуры і Нацийональной Спадковины рішыл про результаты другого набору проґраму Охорона памятників, котрого цілю є захованя материяльной культурной спадковины, реализуваных через консервацию і ревалоризацию памятників та публичне іх удоступняня. Рішыньом Міністра за 20 тис. зл поведе ся м.ін. провести консервацию престола в церкви в Перегримці, зорґанізувати четвертый етап ремонту даху церкви в Королику Волошскым (сума дотациі то 51 тис. зл), так само повалу зроблят в церкви в Завадці Рыманівскій, додатково вымінят і ґонт (дотация – 93 тис. зл), а в музейній церкви в Бортным змодернізуют електричну інсталяцию за 25 тис. зл. Полный список признаных дотаций доступный єст на сайті Міністерства Культуры і Нацийональной Спадковины.

Кайди з новым проєктом

3. серпня/авґуста 2022 рока в Креници, в Парку Нітрібіта, одбуде ся концерт, представляючый проєкт Транскарпатія, якого автором являт ся Михал Кайди, композитор і творця. Транскарпатія то – як сам автор повідат – музичны образы, звуковы імпресиі з Лемковины і Бескідів, імпровізацийна музика без нот. Михал Кайди інспірує ся тіж Лемковином і єй складном історийом. В проєкті Транскарпатія берут участ, окрем композитора, Ева Мікульска – контральт, солистка Камеральной Оперы в Варшаві, піяніста Анджей Мікульскій і Сергій Марчук – саксофоніста.