Приносиме вам сумар медияльной ґрупы ЛЕМ.фм+ на ден 2. вересня/септембра 2020 р.
Малювана Хыжа – єден з найкрасшых конкурсів зас ся одбуде
Добры новины для вшыткых любителів народной культуры. В днях од 11. до 13. вересня/септембра в селі Заліпя проходил буде єден з найстаршых на обшыри Польщы конкурсів під наголовком «Малювана Хыжа». Од 1978 рока орґанізуваный єст він Округовым Музейом в Тарнові та центром культуры «Дом Малярок». Конкурс має на ціли підтримувати знану на цілый світ традицию малюваня хыж в квітный взір, але тіж документувати розвиток та зміны, котры проходят в народній творчости. Свою творчіст артисты можут вказати в штырьох катеґориях: малюнкы на стіні на будинках загороды, малюваня на стіні в середині, на полотні та папери і внутрішні прикрасы. В змаганях каждого рока бере част близко 100 артистів і артисток, а Заліпя на пару дни заполнят ся туристами з цілой Польщы. Роботы оціняны сут через знаменитых етноґрафів, істориків штукы, артистів та журналистів. Традицийні конкурс кінчыл «Заліпяньскій Кєрмеш», де жырі признавало почестны грамоты і нагороды. На жаль того рока такє розвязаня єст неможливе – результаты будут поданы в електронічній формі.
На спокійну старіст та добрый одпочынок
Нове місце на мапі ґорлицкого повіту – тым разом в Вапенным, де од суботы, 29. серпня/авґуста, фунґує Дом Сеньора Мария. То спокійне місце для сеньорів з новом нічліговом базом для вандруючых по Низкым Бескіді туристів. Думка вышла од Катажыны Бараньчук, учытелькы та віцепрезескы фундациі Іліос з Ґладышова, а інвестором єст Антоний Пшыбыльскій. То получыня тых двох персон і долгых дискусий довело до возникніня місця з думком о найстаршых. Хыжа Сеньора може помістити аж 64 особы в невеликых комплексах. Част ізб має специяльны регабілітацийны постели. Сут тіж спільны місця, такы як тарасы ци ідальня. Хыжа ведена буде покликаным в минулым році Закладом Професийной Активізациі. Місце для туристів то єдно, але фундация заповідат, же буде тіж в силі дати опіку для сеньорів не лем на пару дни, але і на долшый час.
Амазонія єст гев
«Амазонія єст гев» – так вытинку Карпатской Пущы коментуют члены ініциятивы Дикы Карпаты. Карпатска Пуща то велика обшыр в полудньово-східній Польшы, яку рахує ся до єдного з найбарже вартістных природничых реґіонів в державі. Находит ся она м.ін. на обшыри надлісництва Тисна, Лютовиска ци Ступосяны, де зараз при граници з Бєщадскым Нацийональным Парком на терені называным 219а роснут 150-річны букы і ялиці. Заплянувана на 2020 рік вытинка обнимат аж 1 000 000 кубометрів дерева, в тым част стрефы 219а, яка богата в віковы дерева і унікатовы птахы. В дискусиі про вытинку Пущы взяли участ не еколоґы і вчены, подля котрых обшыр тота має особливе значыня в затриманю результатів сушы в Польщы. Рахує ся, же гірскы лісы сут в силі затримати коло мілиярда кубометрів дощовой воды. Стары лісы тіж ліпше принимают климатичны зміны, а што найважнійше можут маґазинувати більше діоксиду карбону. Од років бесідує ся о тым, жебы створити в Бєщадах Турніцкій Нацийональный Парк, котрый закінчыл бы спераня ся вытинку. В 2019 році ініциятива Дикы Карпаты вышла з петицийом «Ратуйме 219а» з постулятом створити такій парк. Петицию підписало близко 12 тис. осіб. Ініциятиву створити Турніцкій Нацийональный Парк підтримує польскє одділіня Світового Фонду Дикой Природы.
ХыжоГраня
На конец просиме 5. вересня/септембра до Кривой на третю уж едицию «ХыжоГраня», стрічы зо співаном поезийом та традицийном лемківском співанком. Того рока на сцені запрезентуют ся Капеля спід Рубані, Ганця&Славко, Ручай, Пьотр Бзовскій разом з Ришардом Дзюрдзьом і The Cotton. Концерт зачне ся о 15.00 год.
Коментарі