Сумар дня на 2. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 2. вересня/септембра 2022 р.

В Убли выбудуют біциґльову стежку

В Убли, в Снинскым окресі, выбудуют біциґльову стежку. В минулый віторок была схвалена дотация пряшівского самоурядового краю про місто Пряшів і село Убля. Край передал на будову роверовой стежкы в Убли 100 тис. евро. Село схоснує будову пути на розвиток черезграничного туристичного руху, в рамках першого етапу. Цілю проєкту є выбудувати і поліпшыти якіст біциґльовых трас в Нацийональным парку Полонины і в трансграничній териториі, котра спаят Словацию і Украіну. По реализациі будут створены обставины для розвитку туристичного руху, підпоры цикльотуризму і мягкой туристикы в сниньскым реґіоні. Проєкт є важный і в повязаню з будуваньом біциґльовой трасы Poloniny Trail.

Грекокатолицка церков в Ґладышові буде розписана

В грекокатолицкій церкви в Ґладышові хотят зробити нову поліхромію. Церков была побудувана в 1939 р. і зо взгляду на войну і выселіня не был зреализуваный єй розпис. Аж в 2019 році был створеный проєкт фіґурально-орнаментальной поліхроміі внутрі церкви. Проєт выконали студенты Выділу Сакрального Малярства Львівской Державной Академіі Красных Штук – Алина Грубець і Іван Панас, як дипльомову працу. Проєкт в стилистиці і формі навязує до естетикы інтерєру церкви в 20. і 30. роках ХХ столітя. Іконы были зроблены на підобразях з плыт, а по іх примоцуваню артисты зроблят декорацию і внутрі бані. Парохія просит о спертя в покрытю коштів выконаня поліхроміі через колекту на сайті zrzutka.pl.

В Креници будуют чергову соланкову інгаляторию

Зачали ся працы при будові солянковой інгаляториі на креницкым Чорным Потоці. Нова атракция мала бы быти готова уж на зламі того і будучого місяця. Інгалятория на Чорным Потоці буде уж третьом таком в ґміні, по солянковых інгаляториях в Солотвиньскым Парку і в Теличы.

«Лемківскє Літо» в Чмелю

Уж заран, 3. вересня/септембра, в Чмелю на Нижнім Шлеску одбуде ся чергове «Лемківскє Літо». На подію просит православна парохія св. Тройці в Любіні. Подія пройде на місцевым рекреацийно-спортовым пляци. В проґрамі подіі окрем концертів запрошеных ансамблів сут конкурсы, забавы для діти, лемківска кухня. В пляні сут і дітячы рецитаторскы, вокальны і танцювальны выступы наймолодшых Лемків. Імпреза дофінансувана єст з середків Міністерства Культуры і Нацийональной Спадковины. «Лемківскє Літо» одбыват ся в селі, в якым прожыват вельо Лемків, головно уж потомных выселеных з Білцаревы. Традицийно уж, при поблизкым кресті одбуде ся наше богослужыня.

25 років Лемківского Фолькового Ансамблю «Серенча»

А уж о ден, в неділю 4. вересня/септембра, Лемківскій Фольковый Ансамбль «Серенча» одсвяткує 25 років свойой діяльности. З той нагоды ґрупа заграт ювілейный концерт на спортовым пляци в Білянці при Ґорлицях. Окрем концерту ґаздів, выступлят тіж з новым репертуаром заприязнены колективы Ґалицийскій Квартет і Хор Бельферсінґерс. Серенча была основана в 1997 р. Романом Корбичом, Петром Креницкым і Мирославом Трохановскым. В своім артистичным доробку ґрупа має демо та 5 платен. Інспірує іх традицийна лемківска музика, якій дают нове, цікаве звучаня. Медияльный патронат над подійом тримат наше радийо ЛЕМ.фм.