Сумар дня на 2. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 2. жолтня/октобра 2023 р.

Поступуют працы при будові Via Carpatia 

В минулым тыжни першый одтинок пілнічной обводниці Пряшова был одданый до експлоатациі. Будова 4,3-кілометровой дорогы будучой частином медженародной трасы Via Carpatia заняла понад 4 рокы. Ціла пілнічна обводниця Пряшова має быти завершена до 2027 р. На одданым одтинку находит ся 9 мостів, 155 будовляных обєктів і 1,4 км акустичных екранів. Дальшый етап робіт буде обнимал 10 км дорогы, в тым 12 мостів і тунель. Словацкій одтинок Via Carpatia, експресова дорога R4 ідуча через реґіоны Пряшова і Кошыц, має быти получена з польскым системом експресовых доріг в Выжнім Комарнику-Барвинку. Будова бракуючых одтинків R4 мала бы ся зачати в 2026 р. і завершыти до 2030 р.

Набір в проґрамі Охорона Забытків

Міністер Культуры і Нацийональной Спадковины оголосил набір в проґрамі Охорона Забытків. В едициі проґраму на 2024 р. плянуваны сут два терміны набору: до 31. жолтня/октобра тр. на працы плянуваны до выконаня в 2024 р. та до 31. марця будучого рока на рефундацию прац выконаных в роках 2021-2023. Цілю проґраму єст захованя материяльной культурной дідовизны, реализуване через консервацию і ревалоризацию нерухомых і рухомых забытків та іх удоступняня для публичных ціли. Реґулямін проґраму мож найти на урядовым сайті Міністерства Культуры і Нацийональной Спадковины.

Нове чысло «Бесіды»

Вышло дальше, 5 (194) чысло двомісячника Стоваришыня Лемків – «Бесіда» за місяці вересен/жолтен 2023 р. Часопис просит нас до участи в ХХХІ Лемківскій Творчій Осени. В найновшым номері прочытаме м.ін. статі Петра Трохановского, Наталиі Малецкой-Новак, Павла Коробчака, Северияна Косовского, Дариі Кузяк і Андрия Копчы. Редакция помістила в часописі і резолюцию делеґатів XVII Світового Конґресу Русинів. Окрем постійных части в номері найдете і фотореляцию з ХХІХ Стріч з Лемківском Культуром в Ґожові Великопольскым. «Бесіду» мож почытати в бібліотеці Руской Бурсы в Ґорлицях або придбати в локальных Кружках Стоваришыня Лемків в Польщы. Тот, як тіж архівальны номеры «Бесіды» годны сте придбати в електронічній версиі на сайті Стоваришыня Лемків.

«Новосільскій в Лодзи»

Ближыт ся дальша подія в рамках Pока Юрия Новосільского. В четвер 11. жолтня/октобра о 18.00 год. в Музею Штукы в Лодзи пройде вернісаж выставы пн. «Новосільскій в Лодзи». Експозиция вказує творы зроблены артистом протягом12 років (1950-1062), коли прожывал в Лодзи. То мало знаный шыршій публиці період, в котрым в його малярстві дотерали ся абстракция, реализм і влияня іконописаня та повставали сценоґрафічны і лялькарскы проєкты для лодзіньского театру ляльок. Творы походят головно з колекциі Музею Штукы в Лодзи і колекциі Стармахів в Кракові, але і м.ін. з колекций Містной Ґалериі Штукы в Лодзи, Ченстоховского Музею ци Нацийонального Музею в Ґданьску та приватных колекций. Окрема част выставы то сценоґрафічны і лялькарскы проєкты, в тым тоты зрыхтуваны разом з женом з Археолоґічного і Етноґрафічного Музею в Лодзи, і документация представлінь. Окрем того запрезентуваны будут полотна студентів Академіі Красных Штук в Лодзи зреализуваны під кєрівництвом Новосільского. Выстава буде доступна до 25. лютого/фебруара будучого рока.