Сумар дня на 2. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 2. жолтня/октобра 2024 р.

В Новым Саді бесідували тіж о Русинах з Польщы

В минулу суботу в Новым Саді одбыла ся ювілейна, десята, Медженародна Наукова Конференция Меджекультуровіст в Едукациі «Інтеркульт 2024». Зо своім рефератом присутный был і др Томаш Квока з Ягайлоньского Університету. Тема його выступліня звучала: «Карпато-паноньскы паралелі – культуровы взірці ментальной ґеоґрафіі серед Русинів в Польщы і Войводині». Серед прелеґентів были тіж м.ін. проф. Михайло Фейса, др Ана Рымар Симунович, др Александер Мудрый ци Александра Деянович. Участ в конференциі брали і м.ін. власти Університету в Новым Саді, локальны власти ци представникы Нацийональных Совітів – мадярского, словацкого, хорватского і русиньского – тот представлял Йоакым Рац.

Праздник в Подпрочы

В минулу суботу 28. вересня/септембра в грекокатолицкым храмі святых Кірила і Методия в Подпрочы одбыло ся святкуваня з нагоды 15. річниці одновліня святыні. Село Подпроч лежыт в Левочскых Верхах, послідні жытелі з села одышли в 70. роках минулого столія з причыны втраты землі, котру сконфіскувала ім держава, але і з причыны скомплікуваного приступу до села. Лишыло ся там лем пару домів і храм, котрый был збудуваный коло 1800 року. Домы, котры лишыли по собі Русины, днес сут рекреацийні хоснуваны. В селі на тот момент жыют дві молоды родины. До Подпроча на торжество завитал Высокопреосвященый Йона, пряшівскій архієпископ і митрополита, котрый посвятил новый ківот, скінію і єпископскій трон. В проповіди приговорил ся участным, родакам з Подпроча, архімандрита Марко Дурлак, протосинкєль Пряшівской Архієпархіі.

В Коросні о кухні з Ріпок

В найблизшу пятницю в Коросні одбуде ся чергова, уж XIV едиция подіі пн. Лемківскій Вечер. Тым разом Пшемыслав Поляньскій, головный орґанізатор, та Реставрация Лофтова, запрашают на стрічу з Ґражыном Бетлей-Фурман, авторком книжкы «Лемківска кухня з Ріпок», в котрій зобрала передаваны в єй родині рецептруты. Книжка збогачена є знимками страв і кадрами з села, авторка описує тіж в книжці ріжны традициі, штоденны і святочны звыкы. На подіі буде мож попрібувати ідло інспіруване рецептурами з книжкы, а на конец заграт тріо Т.А.М над Бескідом, заграт співаны давно і тепер лемівскы пісні. Початок подіі о 18.00 год. Вступне дармо.

Хто поможе маленькій спільності з Реґєтова?

Міністер Культуры і Нацийональной Спадковины признал на тот рік дотацию высокости 55 тис. зл на консерваторскы роботы при іконах з іконостасу в православній церкви св. Михала Архангела в Реґєтові. Іконы походят з першой половины ХХ ст., сут в планным стані, а деґрадация поступує, зато вымагают скорой консерваторской інтервенциі. То іконы праздників, Тайной Вечері і ікона Христа Пантократора – разом 14 ікон. Обовязковый для дотациі свій грошовый вклад то 11 тис. зл. Реґєтівска спільнота є барз мала, зато вірны звертают ся до вшыткых, кому близкє є тото село і його церков, о поміч в зобраню потрібных грошів. Одкрыта є соспільна колекта на сайі zrzutka.pl пн. Prace konserwatorskie przy ikonach oraz remont elewacji w cerkwi prawosławnej w Regietowie.