Сумар дня на 20. липця/юлия 2026 р.

Приносиме вам сумар медияльной ґрупы ЛЕМ.фм+ на ден 20. липця/юлия 2026 р.

«Од Русаль до Яна» в Музею Лемківской Культуры в Зындрановій 

В найблизшый вікенд 25.-26. липця/юлия Музей Лемківской Культуры в Зындрановій просит на свято «Од Русаль до Яна». В рамках суботнього проґраму, од 16.00 год, предвиджене єст звиджаня музею, промоция книжок і стрічы з авторами, выклады і доповіди та положыня квітя в місцях памяти. О 18:00 год. одбуде ся концерт, в котрым выступлят Гудаци і Гудобна Ґрупа Еста. Ден завершыт ся огниском. Недільный проґрам одкрыє богослужыня в церкви св. Миколая в Зындрановій. Пак о 13.00 одбуде ся офіцияльне одкрытя подіі і концерт, в котрым запрезентуют ся Свидницкы Геліґонкарі, Капеля Дукляне, Ославяны, Калина, Маковиця, Мариянна Железна і Гоґаш, Карпатія, Гудаци та Бурян. Окрем того будут показ ремесла, конкурсы і забавы. Ден завершыт ся огниском.

Свято Лосяньскых Мазярів

О два тыжні, в неділю 2. серпня/авґуста в Мазярскій Загороді в Лоси сімнадцетый уж раз одбуде ся Свято Лосяньскых Мазярів. На подію просят Музей Дворы Карвациянів і Ґладышів в Ґорлицях, Ґмінный Осередок Культуры в Ропі і Майстерня Карпат. В рамках подіі одбудут ся концерты, варштаты, конкурсы показы ремесла і дальшы атракциі. На концертах запрезентуют ся Капеля Древутня, Ансамбль Лада і Руты Увіты. Вступне 2 злоты.

Мож уж придбати білеты на 46. Лемківску Ватру на Чужыні в Михалові

Выстартувала інтернетова продаж білетів на 46. Лемківску Ватру на Чужыні в Михалові. Припоминаме, што Ватра одбуде ся в днях 31. липця/юлия – 2. серпня/авґуста. Заохочаме слідити маркетінґову кампанію подіі, яка проходит в сіти Фейсбук і на Інстаґрамі. Там тіж найдете мотузок, за котрым мож придбати білеты. В рамках специяльной пропомоцийной оферты мож тіж придбати нормальный білет разом з двотомовым «Контекстуальным словником лемківского языка».

Выремонтуют забытковый придорожный крест в Ганьчовій

Ґорлицкій Повіт выремонтує забытковый придорожный крест, што ся находит при повітовій дорозі 1498К Ропа – Высова – Бліхнарка – границя державы. В минулым тыжни Ґорлицкій Староста підписал догваріня з выконавцьом. Предметом інвестициі єст ремонт забыткового креста з 1898 р. та упорядкуваня і одновліня його найблизшого оточыня. Вартіст задачы то 35 тисячів злотых. Згідно з догваріньом выконавця перенял уж терен прац. Термін завершыня робіт тов жолтен/октобер тр.

Рушыл інновацийный проґрам охороны брунатного медведя

На Підкарпатю і в Малопольщы рушыл інновацийный проґрам, што має на ціли створіня успішшного, превенцийного систему охороны брунатного медведя. Єдночасно проґрам має тырвало звекшыти безпеку жытелів реґіону. Буджет проєкту то понад 19 млн злотых, дофінансуваный з еврофондів. Зосереджат ся на трьох обшырях: (1) модерным моніторінґу, завдякы котрому великы драпіжникы в реґіоні будут безперерывні і докладні сліджены, (2) сперте служб в інтервенциях, што поможе на скорше і барже успішне реаґуваня в ситуациях, коли медвід зближыт ся до місц замешканых людми та (3) едукация і локальна спілпраца, то значыт школіня для жытелів, вказуючы як безпечні фунґувати в сусідстві медведів. В реализацию задач заанґажуваны сут науковці і практикы – лісникы, працівникы нацийональных парків, поліция, урядова адміністрация і самоуряды. Вєдно мают выпрацувати розвязаня, котры позволят успішні хоронити тот ґатунок, а єдночасно звекшыти безпеку люди і ограничыти конфліктовы ситуациі.