Приносиме вам сумар медияльной ґрупы ЛЕМ.фм+ на ден 20. листопада/новембра 2020 р.
Бесідували з уповномоченым влады Л. Буковскым про повселюдне списуваня на Словациі
Председа Округлого Стола Русинів Словациі Петро Штефаняк і секретар Мілан Ян Піліп, якій є так само і урядником словацкой влады, значыт є председом Уряду про Словаків Жыючых Загранцьом, бесідували передвчера з полномічным влады Словацкой Республикы про народностны меншыны Ласлом Буковскым на темы списуваня жытелів в 2021 році і поставліня народностных меншын на Словациі. Русиньска інтеліґенция зосереджена при Округлым Столі Русинів Словациі опрацувала детальный плян кампаніі промуючой повселюдне списуваня, котре буде проходило на Словациі од лютого/фебруара будучого рока. Дакотры єй елементы видно уж в сіти інтернету. Примірово, на профіли Русины на Словациі на ґамбокнижці доступна є до схоснуваня накладка-фоторамка на профільову знимку, з написом «Сме Русины», будуча частю візуальной ідентифікациі реченой промоцийной кампаніі. В плянах є іщы друк летушок, плякатів, більбордів і продукция інчых, прим. відеоматериялы, котрых цілю є заохотити люди, жебы подавали ся за Русинів вчас повселюдного списуваня.
Варштаты русиньского языка на Бачваньскій Руси
В середу, 18. листопада/новембра, в русиньскій основній школі ім. Петра Кузмяка в Рускым Керестурі в Сербіі проходило школіня учытелів з обшыри загальных стандардів материньского языка на закінчыня першого циклю основного едукуваня і выховуваня з предмету русиньскій язык. Діґітальный підручник для учытелів представила на стрічы єдна з його авторок Наталия Зазуляк. На варштатх присутны были учытелькы з місцевой школы Петра Кузмяка та зо школы Братство-єдинство з сусіднього Коцура. Гости привитала директорка керестурской єдиниці Наталия Будиньскій.
В Ропі тырват будова Дому Творчой Працы
В Ропі будувана є Гыблівка, значыт Дом Творчой Працы посвяченый Антонийови Гыбльови, творці тзв. гушель з крылатом душом. Іщы в вересни/септембрі видны были лем фондаменты, тепер кінчены сут роботы при мурах. Дом, в котрым мешкал Антоний Гыбель, згоріл. В його місци возношеный є новый обєкт, якій, згідні з рекомендациями консерватора памятників, по части заховат бывшый архітектонный характер. Змінит ся функция – буде то осередок творчой роботы, в котрым проходити будут варштати, школіня, експозициі, едукацийны стрічы. Aнтоний Гыбель узнаваный є за творцю тзв. гушель з крылатом душом. Гушльовый майстер з Ропы змодифікувал клясичный інструмент так, жебы музикант мал легшый доступ до него смыком. В заложыню граня мало быти менше мучаче, бо не змушало ненатурально выгынати руку. Новый обєкт має быти одданый до хоснуваня в будучым році.
Протестували тіж ґорлицкы перевозникы
Утримуюча ся епідемічна ситуация в державі доводит до банкрутства черговы фірмы. На списку найбарже загороженых находят ся і тоты, якы оферуют транспорт осіб, особливо ґруповый, автобусовый. Представникы транспортового сектора штораз барже боят ся о своє перетырваня. В віторок, 17. листопада/новембра, в Кракові проходил протест автобусовых фірм, в котрым взяли участ тіж перевозникы з ґорлицкого реґіону. Протестуючы блокували Алеі, домагаючы ся збільшыня помочы для іх бранжы. Хотіли звернути увагу, што находят ся серед міцно потерпілых бранжы і повинны быти влучены до проєкту дальшого антикризового щыту.
Фот. за Русины на Словакії
Коментарі