Голосник

Сумар дня на 20. лютого/фебруара 2020 р.

Приносиме вам сумар медияльной ґрупы ЛЕМ.фм+ на ден 20. лютого/фебруара 2020 р.


Методика на навчаня языків нациойональных меншын через урядників

«Методична інструкция ґу забезпечыню языкового компетенцийного навчаня заміряного на утримуваня і досконаліня рівня знаня языка нацийональных меншын про ґрупу державных робітників выконуючых державну службу в селах выміненых в окремым приписі» – так звучыт полна назва документу, о выданю котрого полномічный влады Словацкой Республикы про Нацийональны Меншыны і Етнічны Ґрупы інформувал 6. лютого/фебруара окремых членів влады і декотрых державных робітників. Документ має помагати тому, жебы урядникы освоювали собі язык нацийональной меншыны, кєд роблят на селах або в містах, де жыє більше як 20% членів нацийональной меншыны, котры мают право хоснувати рідный язык і в контакті з урядом. Пільотажовый проґрам проходил уж влони. Товды был орґанізуваный курс навчаня про робітників в Меджелабірцях, котры сут єдиным окресным містом, котре має понад 20% русиньского населіня. Документ, про котрый бесідуєме, є оцінюваный як історичный в меншыновій політиці на Словациі.


«Ден лемківской книжкы» в Івано-Франківску

1. марця в Івано-Франківску в Украіні одбуде ся «Ден лемківской книжкы». Подія пройде в Народным Домі «Княгынин». Участникы подіі будут мочы слухати, як і чытати власны улюблены фраґменты книжок, представляти авторскы пісні і просто бесідувати на ріжны темы повязаны з лемківском літературом і культуром. Орґанізаторы просят, жебы принести зо собом – очывидно – книжкы, якы не сут уж Вам потрібны. На стрічы буде мож передати публикациі або вымінити ся нима з другыма. Добрі єст принести зо собом і свою улюблену книжку, так жебы представити ю інчым, зохотити чытачів і оповісти, чом як раз она єст про вас найліпшом книжком на лемківску тему. Подія зачне ся о 13.00 год.


Выстава писанок 2020

Выгорлятскій Музей в Гуменным як головный орґанізатор медженародной конкурсово-презентацийной выставы крашеных яєц «Карпатска Писанка 2020» ословлює шыроку публику, жебы взяти активну участ в подіі, котра буде проходила од 12. марця до 26. квітня/апріля 2020 р. Як інформувала Яна Федічова з Выгорлятского Музею, вшыткы любителі крашыня яєц мают можливіст запрезентувати авторску колекцию своіх писанок зробленых традицийном або сучасном техніком крашыня. Жырі пак в рамках статуту медженародной выставы оцінює і дає нагороды авторам в окремых віковых і творчых катеґориях. Тогорічна выстава писанок дає і можливіст іх продати. Дотепер музей в Гуменным презентувал понад 23 тис. писанок од близко 6 тис. авторів з Чешской Республикы, Украіны, Польщы, Мадяр, Румуніі і Словациі.


Ближыт ся ювілейна «Ружова Заградка»

В Новым Саді в Сербіі рыхтуют ся до ювілейного 30. Фестівалю Новой Русиньской Співанкы «Ружова Заградка». Одбуде ся він 1. марця в Студию М в Новым Саді. Того рока буде представляло ся штырнадцет новых народных композиций, котры будут співаны уж познаныма солистами і єдном ґрупом при акомпаніяменті Великой Нацийональной і Великой Тамбуровой Оркєстры Радийо-телевізиі Войводины. В рамках фестівалю одкрыта буде і выстава фотоґрафій Івоны Торма-Джамич, а в концертовій части фестівалю буде выконуваных штырнадцет композиций з попередніх «Заградок», але в новых аранжациях. Вшыткых творів презентуваных на подіі за тридцет років буде 400 – в тым сут співанкы з тогорічной едициі акциі. «Ружову Заградку» орґанізує Радийо-телевізия Войводины, єй русиньска редакция і музична редакция і продукция РТВ Войводины.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі