Голосник

Сумар дня на 20. марця 2020 р.

Приносиме вам сумар медияльной ґрупы ЛЕМ.фм+ на ден 20. марця 2020 р.


На Словациі інформациі про коронавіруса і по русиньскы

В звязку з актуальном ситуацийом пошырюваня ся коронавіруса в Европі в середу, 18. марця, полномічный влады Словацкой Республикы про меншыны Ласло Буковскій выдал своє выголошыня. Припомнул він в ним, што вшыткы інформациі, написы і оголошыня, котры тыкают охороны жытя, здоровля, безпекы мусят быти подаваны і в меншыновых языках. З той причыны забезпечыл переклад основных інформаций о коронавірусі до мадярского, ромского, русиньского, украіньского і німецкого языків. Мож іх чытати на вебсайтах реґіональных урядів публичного здоровля. Буковскій апелювал до представничкы Центрального Кризового Штабу Словациі Денісы Саковой (котра є єдночасно і міністерком внутрішніх справ), жебы при дальшым інформуваню люди в повязаню з грозьбом коронавіруса памятано про установліня меншынового языкового закону. Обовязок тот тыкат ся не лем орґанів публичной справы, але і правных і фізичных осіб, такых як социяльны інституциі та шпыталі ци єдиниці як сіти склепів Tesco, Kaufland, Lidl ци Словацка Желізніця. За недотримуваня того обовязку може быти признана кара од 50 до 2500 евро.

23 млн зл для підкарпатскых підприємців

Заряд Підкарпатского Воєвідства признал 23 млн зл бєщадскым підприємцям. То о 8 млн більше як перше закладано. Дофінансуваня з Реґіонального Операцийного Проґраму о вартости 46 млн зл отримают 42 проєкты. Плянуваны ініциятивы тыкают шыроко пониманой туристикы. Зо середків скорыстают фірмы, якы ведут діяльніст на обшыри 12 ґмін з полудня підкарпатского воєвідства, м.ін.: Команча, Балігород ци Тырава Волошска. Властителі фірм плянуют м.ін. будову літніх хыжок під аренду, розбудову готелів, будову СПА ци стаций до ладуваня електричных поіздів.

Голосуваня на найліпшу фолькову платню 2019

В понедільок, 16. марця, выстартувало інтернетове голосуваня в конкурсі Віртуальны Гушлі на найліпшу фолькову платню 2019. Є то конкурс, в котрым не критикы, а публика выберат найбарже інтересуюче музичне выдавництво – выміг єст такій, же мусит презентувати музику світа. На тогорічным списку, окрем платен з музиком інспіруваном славяньском традицийом, нашло ся вельо пропозиций музикы з дальшых части світа – є платня з електронічном музиком інспіруваном фляменко, фузия індийской і західньой музикы, є музика східньой Европы богата в звукы Тибету ци музика інспірувана духом поезиі Чорной Африкы. Окрем голосуваня на найліпшу платню (мож додатково выріжнити іщы 4 інчы платні), проходит голосуваня на націкавшу окладинку. Голосы оддавати можна на сайті gesle.folk.pl. Серед дотеперішніх лавреатрів находят ся м.ін. ансамблі Черемшына ци Оркєстра св. Миколая. Голосуваня орґанізуване є од 2003 рока.

Акция Жаба в Низкым Бескіді

Шістнадцетый раз Маґурскій Нацийональный Парк зорґанізувал в Низкым Бескіді Акцию Жаба. Ратуваны сут земноводны, котры масово гынули на дорозі Ясло-Крампна в околицях Нового Змигороду. Жабы зачали як раз весняну вандрівку до ставів, де ся розводят. Іх пут веде впілперек дорогы. Вздолж дорогы уставлено сіткы – жабы затримуют ся на них, а працівникы парку штоденно переносят іх на другу страну. В залежности од хвилі і звязаного з тым часу міґрациі, Акция Жаба тырват од 3. до 6. тыжнів. Што рока ратує ся в тот спосіб пару тисячів жаб. Іх вертаня з міцся, де ся розводят, є уж менше небезпечне, бо тырват на вельо долше і не єст так масове.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі